Հիլարի Քլինթոնը մտավ պատմության մեջ որպես առաջին կին, ով ԱՄՆ-ի առաջնային կուսակցություններից մեկի նախագահի հիմնական թեկնածու է:
«Ես ընդունում եմ ԱՄՆ նախագահի թեկնածությունը»:
69-ամյա Հիլարի Քլինթոնի կյանքը լի է պատմական պահերով:
1969 թվականին նա դարձավ առաջին ուսանողն, ով ելույթ ունեցավ Ուելսլի քոլեջի հանդիսավոր արարողությանը: Յել համալսարանի իրավաբանական դպրոցում նա հանդիպեց Բիլ Քլինթոնին: Նրանք ամուսնացան, իսկ նրանց դստեր անունն է Չելսի: 1992 թվականին Բիլ Քլինթոնն ընտրվեց նախագահ, իսկ Հիլարի Ռոդհեմ Քլինթոնը ստանձնեց Առաջին տիկնոջ պարտականությունները:
Լրագրող Ռոն Ֆորները շատ վաղուց հետևում է Քլինթոնի կարիերային:
«Նա գիտեր, թե որն է իրենց երկարաժամկետ քաղաքական ծրագիրը և հետևում էր դրան»:
Սակայն Քլինթոնի կյանքում եղել են հակասական պահեր ևս, որոնցից ամենացայտունը նախագահ Քլինթոնի ամուսնական դավաճանություններն են, որի գագաթնակետն էր Մոնիկա Լևինսկու հետ կապված սկանդալը:
«Շատ մարդիկ կարծում են, որ նա անկեղծ ու վստահելի մարդ չէ», ասում է Ջորջթաուն համալսարանից Ստեֆան Վեյնը:
Սակայն 2001 թվականին նախկին Առաջին տիկին Հիլարի Քլինթոնը կրկին մտավ պատմության մեջ՝ ընտրվելով սենատոր Նյու Յորք նահանգից: Նա քվեարկել էր 2003 թվականի իրաքյան պատերազմի և 2007 թվականի ներգաղթի մասին օրենքի օգտին:
«Մեզ անհրաժեշտ են ընդգրկուն բարեփոխումներ ներգաղթի ոլորտում»:
Նախագահ Օբաման ին նախկին մրցակից Քլինթոնին նշանակեց պետքարտուղար: Այդ պաշտոնում Հիլարի Քլինթոնն այցելեց շուրջ 112 երկիր։ Նա ամենամեծ թվով երկրներ այցելած բարձրաստիճան ամերիկացի դիվանագետն էր:
Քլինթոնին սուր քննադատության ենթարկեցին Բենգազիայում ամերիկյան դեսպանատան վրա հարձակման համար, որի հետևանքով սպանվեցին չորս ամերիկացիներ:
2016 թվականի նախագահական ընտրապայքարի ընթացքում նա հայտնվեց մեկ այլ սկանդալի մեջ, որի հետևանքները պարզ կլինեն ընտրություններից հետո:
2015 թվականին հայտնի դառձավ, որ Քլինթոնը օգտագործել է անձնական էլեկտրոնային փոստը՝ կարևոր պետական տեղեկություն պարունակող նամակագրության համար: Դաշնային հետախուզական բյուրոն, սակայն, այդ գործունեության մեջ չգտավ անօրինական տարրեր:
«Ոչ մի դատախազ հիմքեր չի ունենա գործ հարուցելու համար», ասել է Դաշնային հետախուզական բյուրոյի տնօրեն Ջեյմս Քոմին:
Սակայն ընտրություններից տաս օր առաջ Դաշնային հետախուզական բյուրոն հայտնաբերեց նոր էլեկտրոնային նամակներ, որոնք, ըստ բյուրոյի, պետք է ուսումնասիրվեն: Այդ նամակագրությունը դարձել է Քլինթոնի դեպի Սպիտակ տուն ճանապարհի հիմնական մարտահրավերը:
