Հայաստանի նախագահ Սերժ Սարգսյանը և Ադրբեջանի նախագահ Իլհամ Ալիևը հնարավոր է հանդիպեն Փարիզում: Այդ մասին ԵԱՀԿ գործող նախագահ, Գերմանիայի արտգործնախարար Ֆրանկ-Վալտեր Շտայնմայերի հետ համատեղ մամուլի ասուլիսի ժամանակ հայտարարել է Ադրբեջանի արտգործնախարար Էլմար Մամեդյարովը, հայտնում է РИА Новости-ն:
«Ղարաբաղյան հակամարտության կարգավորման հարցով Հայաստանի և Ադրբեջանի նախագահների հաջորդ հանդիպումը կարող է տեղի ունենալ ֆրանսիայում: Ֆրանսիական կողմն առաջարկել է նախագահների նման հանդիպում անցկացնել»,- հայտարարել է Մամեդյարովը՝ չհստակեցնելով հնարավոր հանդիպման ամսաթիվը:
Ավելի վաղ ՀՀ արտաքին գործերի նախարար Էդվարդ Նալբանդյանն ասել էր, որ Հայաստանը բարձր է գնահատում գերմանական նախագահության աջակցությունը ԵԱՀԿ Մինսկի խմբի համանախագահների ջանքերին՝ ուղղված ղարաբաղյան հիմնախնդրի բացառապես խաղաղ կարգավորմանը: Նա նաև ասել էր, որ Ղարաբաղի վերջնական կարգավիճակը պետք է որոշի ԼՂ ժողովուրդը՝ ազատ կամարտահայտության միջոցով։
