Առաջին ատյանի ընդհանուր իրավասության դատարանի Շենգավիթ նստավայրում այսօր միջադեպ է տեղի ունեցել՝ , երբ ընթանում էր Տիգրան Առաքելյանին վերաբերող դատական նիստը։
Asekose.am-ի տեղեկություններով, հանրային մեղադրողը հարձակվել է ամբաստանյալ Տիգրան Առաքելյանի վրա։
Դեպքի մասին զրուցեցինք Առաքելյանի փաստաբան Հովիկ Արսենյանի հետ, ով փոխանցեց հետևյալը․
«Դատական նիստի ընթացքում Տիգրան Առաքելյանը միջնորդություն է ներկայացրել, որ ցանկություն ունի բացարկ հայտնել հանրային մեղադրողների նկատմամբ։ Դատարանը խնդրեց միջնորդությունը գրավոր ներկայացնել և 15 րոպե ընդմիջում հայտարարեց, որից հետո Տիգրանը սկսեց գրավոր ձևակերպել իր միջնորդությունը։ Այդ ընթացքում մենք դրսում էինք, իսկ երբ ընդմիջման 13-րդ րոպեին վերադարձա դատական նիստերի դահլիճ, տեսա, որ հանրային մեղադրողներից մեկը դուրս է եկել իրեն հատկացված տարածքից և փորձ է անում մոտենալ Տիգրան Առաքելյանին»,-ասաց փաստաբան Հովիկ Արսենյանն ու հավելեց․ «Դատական կարգադրիչներն այնտեղ էին և կանգնել էին Տիգրան Առաքելյանի և հանրային մեղադրողի արանքում։ Իսկ եղել է հետևյալը՝ Ընդմիջման ժամանակ Տիգրան Առաքելյանը դիմել է հանրային մեղադրող Հարությունյանին, նա էլ պատասխանել է․« Ի՞նչ ա , արա, պարտավոր չեմ հետդ խոսեմ»։ Դրանից հետո սկսված լեզվակռվի ժամանակ հանրային մեղադրողի ագրեսիվությունը բոլորի մոտ էլ տհաճություն է առաջացրել»։
«Տպավորություն առաջացավ , որ նոր կոչումներ ստացած հանրային մեղադրողներին էթիկայի կանոնները լավ չեն բացատրել։ Եթե չեն ուզում ամբաստանյալի հարցին պատասխանել, չի նշանակում, որ պետք է «արա»-յով արձագանքեն ու ագրեսիվ պահվածք ունենան։ Տիգրան Առաքելյանի մեղմ, կուլտուրական տակտիկային ու հարցին հանրային մեղադրողի այդպիսի ագրեսիվ արձագանքն խիստ անընդունելի ու դատապարտելի է»,- եզրափակեց փաստաբան Հովիկ Արսենյանը