«Ամբողջական պատկերը կարող է պարզ դառնալ ծառայողական պատշաճ քննության արդյունքում»,- անդրադառնալով ձնահյուսի պատճառով զինծառայողի ողբերգական մահվան դեպքի վերաբերյալ հարցին, ասաց ՀՀ ՊՆ նախարար Սուրեն Պապիկյանը:
Նախարարը նաև նշեց, որ վերջին 3 տարվա ձևավորված առաջնագծի հետ գործ ունենք, որտեղ ոչ բոլոր ուղղություններն են իրենց հայտնի՝ որպես պոտենցիալ ձնահյուսքերի ուղղություններ։
Սուրեն Պապիկյանի խոսքով՝ այդ օրը ունեցել են 5 զինծառայող, ում ծառայության ժամկետն ավարտվել է, բայց անբարենպաստ եղանակների պատճառով շարունակել են ծառայել և միայն երկու օր անց են իջել և պատշաճ զորացրվել տուն։
«Կա վարկած, որ շատ է եղել արտաքին ճնշումը»,- ասաց նա` ակնարկելով, որ հարազատների կողմից անհարկի ճնշումներ են եղել սպայական կազմի վրա:
Սուրեն Պապիկյանը նշեց, որ այս պահին ունեն 200-ից ավելի դժվարամատչելի դիրքեր, որոնք եղանակի պատճառով մշտապես փակման ենթակա են և շուրջ մեկ տասնյակի հասնող դիրքեր, որտեղ բոլոր տիպի եղանակների պայմաններում մեքենայով հնարավոր չի հասնել։