«Ինձ թվում է, չպետք է մոռանալ, թե ինչ բացահայտ տապալումներով են ավարտվել Փարիզի միջնորդական գործունեության հետևանքները»,- այսօր կայացած ճեպազրույցի ժամանակ հայ-ֆրանսիական ջերմացող հարաբերությունների մասին խոսելիս նշեց ՌԴ ԱԳՆ ներկայացուցիչ Մարիա Զախարովան` որպես վառ օրինակ բերելով Սախելի տարածաշրջանում տեղի ունեցածը: «Չգիտեմ` Հայաստանի ղեկավարությունը պատմո՞ւմ է իր ժողովրդին այս ամենի մասին, ճիշտ կաներ` պատմեր: Հայաստանի ապագան Փարիզի համար մանրադրամ է, մի միջոց` սեփական բարօրությունը պահելու համար»,- զգուշացնում է Զախարովան:

Թարմացված․ ՌԴ ԱԳՆ պաշտոնական ներկայացուցիչ Մարիա Զախարովան միամտություն է համարում այն պնդումը, թե Ֆրանսիան պատրաստ է կամ ի վիճակի է ապահովել Հայաստանի անվտանգությունը:
«Միամտություն է կարծել, թե Ֆրանսիան պատրաստ է կամ ի վիճակի է ապահովել Հայաստանի անվտանգությունը։ Եթե նա նման հնարավորություններ ունենար, ապա դրանք կկիրառեր այն երկրներում, որտեղ պայմանագրային պարտավորություններ ուներ, որտեղ պարտավոր էր դա անել, որովհետև դրա դիմաց գումար էր ստանում: Ֆրանսիայի ներկա իշխանությունները բնավ չեն առաջնորդվում Հայաստանի ու հայ ժողովրդի շահերով, այլ՝ իրենց վիրավորված աշխարհաքաղաքական ամբիցիաներով, հակառուսական դիրքորոշմամբ, իսկ Հայաստանի և ամբողջ Հարավային Կովկասի ապագան գործիք է Ֆրանսիայի սեփական շահերն առաջ մղելու համար։