ՀՊՃՀ (Պոլիտեխնիկ)-ի ամենամյա ավանդական երգի-պարի 35-րդ հոբելյանական փառատոնը կմեկնարկի այսօր: Բացումն այս տարի համընկնում է «Էրեբունի-Երևան-2795» տոնակատարության հետ:
35 տարվա հարուստ պատմություն ունեցող փառատոնն ի սկզբանե որդեգրել է մեծ առաքելություն՝ հայոց ազգային մշակույթի գանձերը դարձնել ժողովրդի սեփականությունը:
Փառատոնն առաջին անգամ տեղի է ունեցել 1979 թվականին՝ ԵրՊԻ-ում՝ Երևանի Պոլիտեխնիկական ինստիտուտում՝ մի քանի նվիրյալների ջանքերով:
Յուրքանչյուր տարի այն մեծ տոնախմբության է վերածվում, որտեղ տարբեր խմբեր յուրովի են ներկայացնում ազգագրական գոհարները:
«Պատահական չէ, որ հենց Պոլիտեխնիկում է սկիզբ առել ամենամյա այս փառատոնը, քանի որ 70-ականներին հենց այստեղ է հիմնադրվել առաջին ազգագրական խմբերից մեկը՝ Վանը, որը ձևավորվել է դեռևս 60-ականներին գործող Պոլիտեխնիկի Վան քառաձայն երգչախմբի հիմքի վրա»,- ASEKOSE.am-ի թղթակցին տեղեկացրին փառատոնի կազմկոմիտեից:
Փառատոնի ծրագիրն այս տարի տարբերվող է:
Մեկնարկը տրվելու է այսօր՝ Մատենադարանի մոտ, այնուհետև խմբերը երթով քայլելու են դեպի Կասկադ, Ազատության հրապարակ, որտեղ էլ կայանալու է փառատոնի բացման հանդիսավոր արարողությունը:
Մեր զրուցակցի խոսքով.
«Վերջին տարիներին մի տեսակ խամրել էր փառատոնի երբեմնի շուքը, միապաղաղություն ու միօրինակություն էր մտել մեր սիրելի փառատոնի մեջ: Սա պատճառ հանդիսացավ, որ Պոլիտեխնիկի նախկին ու ներկա ուսանողների ջանքերով նախաձեռնվի երթ, որը կթարմացնի փառատոնի մթնոլորտը և այն դուրս կհանի Պոլիտեխնիկի սահմաններից»:
Փառատոնին մասնակցելու են «Ակունք», «Կարին», «Մարաթուկ», «Մասունք», «Նուբար», «Սասնա ծռեր», «Սասուն», «Վան», «Վերադարձ», «Տավրոս» և այլ ավանդական երգի-պարի խմբեր, «Հավասի» աշուղական երիտասարդական անսամբլը, լարախաղացներ (փահլեվան) և այլն:
Հոկտեմբրի 14-ին ՀՊՃՀ-ում անցկացվելու են վարպետաց դասեր, դասախոսություններ, թեմատիկ ֆիլմերի ցուցադրում, իսկ հոկտեմբերի 16-17-ին կայանալու է բուն փառատոնը` ՀՊՃՀ-ի մեծ դահլիճում ժամը 15.30-ից:
Լուսանկարի հեղինակ` Մարտին Ակողյլան
Հեղինակ՝ Հասմիկ Գյոզալյան
