Կառավարության երեկվա նիստին հավանության արժանացավ «ՀՀ պաշտպանության ժամանակ զինծառայողների առողջությանը կամ կյանքի վնասի փոխհատուցման մասին» օրինագիծը, որով նախատեսվում է, որ 2017 թ. հունվարի 1-ից յուրաքանչյուր աշխատող ֆիզիկական անձ ամսական 1000 դրամ է վճարելու ֆոնդին. նվազագույն աշխատավարձ ստացողների համար բացառություններ կարվեն:
Անդրադառնալով այս թեմային՝ ԱԺ փոխխոսնակ Էդուարդ Շարմազանովը մեզ հետ զրույցում ասաց. «Իմ կարծիքը այս նախագծի վերաբերյալ, միանշանակ, դրական է: Դա շատ բարոյական գործընթաց է: Կարծում եմ՝ այս գաղափարի վերաբերյալ երկրորդ կարծիք լինել չի կարող: ՀՀ յուրաքանչյուր քաղաքացի պետք է իր մասնակցությունը ցուցաբերի այդ սուրբ գերծին: Նոր հեծանիվ հայտնագործել պետք չէ. այդ երևույթը գոյություն ունի ողջ աշխարհում: Դա կոչվում է ազգային տուրք կամ բանակի տուրք: Ավելին՝ կարծում եմ՝ ապագայում այս գաղափարը կարող է դառնալ համակայկական, այս գաղափարին կարող է միանալ նաև սփյուռքը: Բայց այն, որ ՀՀ յուրաքանչյուր քաղաքացի պետք է գոնե մինիմում հազար դրամով աջակցի բանակի հզորացմանը ու սոցիալապես անապահով զինվորներին ու նրանց ընտանիքներին, կարծում եմ, քննարկման ենթակա չէ: Այս գաղափարն անքննելի է. դա քրիստոնեական ու բարոյական գաղափար է»:
Էդուարդ Շարմազանովն ընդգծեց՝ արդեն իսկ լսել է այնպիսի տեսակետներ, թե՝ այդ գումարը պիտի իշխանության ներկայացուցիչները վճարեն կամ այլք, բայց, ըստ ԱԺ փոխխոսնակի՝ ամեն մեկն իր տեղն ունի ու որևէ մեկը չպիտի դատավորի դեր ստանձնի այս հարցում:
«Յուրաքանչյուրս պետք է աջակցենք բանակին՝ ամեն մեկս մեր չափով: Պետությունը բոլորս ենք: Դա աշխարհում ընդունված բան է. բանակի հարկ կամ ազգային տուրք… ինչպես ուզում եք, անվանե՛ք դա, բայց պետք է հիշել՝ բանակը պահպանում է բոլորիս անվտանգությունը: Ընդունում եմ՝ կա մտահոգություն, որ կարող է այդ գործընթացը հրապարակային չընթանա: Խնդիր չկա. եկե՛ք դրա մասին խոսենք, եկե՛ք նայենք, քննարկենք, հասկանանք՝ ինչ պետք է անել, որ այդ ֆոնդը հնարավորինս բաց լինի, թափանցիկ, հրապարակային և ավելի շատ հաշվետվություններ լինեն: Եվ այդ հանձնարարականը նախագահը տվել է Վիգեն Սարգսյանին: Ի վերջո, դժվար չէ ճշտել՝ տվյալ ընտանիքը ստացե՞լ է այդ գումարը, թե՞ ոչ: Ոմանք փորձում են այդ գաղափարը քննարկման դնել՝ այդ թվում որոշ պատգամավորներ, բայց սա ազգային ու քրիստոնեական գաղափար է:
Քննարկվում է նաև այն հարցը, թե նա, ով շատ աշխատավարձ է ստանում և նա, ով քիչ է վաստակում, երկուսն էլ պետք է հազար դրա՞մ տան: Բայց եկեք հասկանանք ՝ խոսքը մինիմումի մասին է: Խնդիր չկա, այդ հարցը ևս կարելի է քննարկել: Եթե իմ աշխատավարձն ավելի բարձր է թոշակ ստացող տատիկ-պապիկի թոշակից կամ մանկավարժի աշխատավարձից, բնական է, ես պիտի ավելի շատ վճարեմ, քան այն հարար դրամ տվողը: Քնարկումները կշարունակենք ու ավելի արդյունավետ ձև կմշակենք: Հիշե՛նք Նապոլեոնի խոսքերը. «Ով չի ուզում պահել ու կերակրել իր բանակին ու ԶՈՒ-ին, նա ստիպված կլինի հոգ տանել ուրիշի բանակին»: Պետությունը, բանակը բոլորինս է:Պետք է Իսրայելից օրինակ վերցնենք: Այդ երկիրը գնացել է այս ճանապարհով: Ես կարծում եմ՝ հանրության ճնշող մեծամասնությունն այս գաղափարին կողմ է, քանի որ մեր ժողովուրդը բարոյական է, հայրենասեր և իր պետական արժեքներին ու բանակին հավատարիմ»:
