Ավստրալիայի Մելբուռն քաղաքում որպես ավտոբուսի վարորդ աշխատող հայ ներգաղթյալ Երվանդ Գարգինյանը հայտնի է դարձել այն բանից հետո, երբ նրա աղջիկը համացանցում ներբեռնել է տեսանյութ, որում հայրը ցույց է տալիս, թե ինչպես են պատրաստում «իսկական» խորովածը։

The Daily Mail-ը գրում է, որ 60-ամյա Երվանդը, ով Հայաստանից Ավստրալիա է տեղափոխվել 1977-ին, տեսանյութում սովորեցնում է ավանդական խորոված պատրաստել՝ միևնույն ժամանակ քննադատելով ավստրալական խորոված պատրաստելու ոճը։

«Ողջույն, ես ցանկանում եմ ձեզ ցույց տալ՝ ինչ է իսկական խորովածը։ Ոչ ձեր նրբերշիկով «բարբեքյուն»։ Սա՛ է իսկական խորովածը, որը կոչվում է հայկական խորոված։ Մեկ անգամ ուտելով՝ դուք ձեր մատներն էլ հետը կուտեք, իսկ հետո կզղջաք, որ կերել եք ձեր մատները»,- ասում է Երվանդը։ 

Երվանդի դուստրը՝ Էլիզաբեթը, պատմել է, որ իրենք նույնիսկ չեն էլ մտածել, որ հոլովակը նման հաջողություն կունենա։ Էլիզաբեթի խոսքով՝ իր հայրիկին դուր է գալիս հայտնի լինելը։ «Նա շատ ուրախ է, երջանիկ, որ ամբողջ աշխարհում այդքան մարդ տեսել է իր խորովածը»,- պատմել է նա։