Երևանի ավագանում «Մայր Հայաստան» խմբակցության անդամ Արմենակ Դանիելյանի ֆեյսբուքյան գրառումը՝ կից տեսանյութով․ «Երևանի քաղաքապետարան, այս անմխիթար փողոցը Արաբկիր վարչական շրջանի Քանաքեռ-ՀԷԿ թաղամասի Ղափանցյան փողոցն է։ Այս և հարակից փողոցները խիտ բնակեցված և ինտենսիվ երթևեկությամբ փողոցներ են։ Այստեղով մերօրյա նորաթուխ և մեծահարուստ իշխանավորների երեխաները ամեն օր հաճախում են ԱՅԲ դպրոց։
Տիգրան Ավինյան, թեպետ ամբողջ քաղաքի փողոցները փոսերով հարուստ են, իսկ շատ փողոցներ էլ հիմնանորոգման կարիք ունեն, այնուամենայնիվ հիշեցնեմ, որ այս փողոցը նույնպես գտնվում է Երևան քաղաքի տարածքում և ուշադրության, վերանորոգման ու խնամքի կարիք ունի։
Երևանցիներին հիշեցնեմ, որ մեր քաղաքի ասֆալտբետոնե ծածկի վերանորոգման և հիմնանորոգման համար ձեր վճարած հարկերից, տուրքերից և տեղական այլ վճարներից գոյացած մայրաքաղաքի բյուջեից միլիարդավոր գումարներ են հատկացվում, որ ձեր մեքենաները անվնաս երթևեկեն Երևանում։ Սակայն քանի գնում` ձեր գրպանի, ձեր դրամապանակի շնորհիվ Երևանի բյուջեն մեծանում է, բայց միևնույն ժամանակ ասֆալտապատման աշխատանքները նվազում են.
2024թ. - 4 մլրդ հատկացում
2025թ. - 3 մլրդ հատկացում
Հ. Գ. Թե բա` աննախադեպ ասֆալտապատում ու փոսալցում, հիմնանորոգում ու վերանորոգում։
Սուտ, կեղծիք ու խաբեություն»։