Թբիլիսիում շարունակվում է շախմատի աշխարհի գավաթի խաղարկությունը: Լևոն Արոնյանը կիսաեզրափակչի առաջին երկու պարտիաներում դասական շախմատի կանոններով ոչ-ոքի էր խաղացել ֆրանսիացի Մաքսիմ Վաշյե-Լագրավի հետ:
Այսօր կողմերը թայ-բրեքով որոշեցին հաղթողին: Արագ շախմատով նախ հաղթանակ տարավ ֆրանսիացի շախմատիստը, այնուհետև Արոնյանը կարողացավ հավասարեցնել հաշիվը: Կայծակնային շախմատի բոլոր 4 պարտիաները խաղաղ ելք ունեցան:
Արդյունքում հաղթողը որոշվեց «արմագեդոն» պարտիայում, որտեղ սպիտակներով խաղացող Արոնյանը պետք է պարտադիր հաղթանակ տաներ եզրափակիչ դուրս գալու համար: Այդ պարտիայում մեր շախմատիստը 78-րդ քայլին ստիպեց մրցակցին անձնատուր լինել:
Եզրափակիչի մյուս ուղեգիրը նվաճել է չինացի Դին Լիրենը (2771), որը թայ-բրեյքում առավելության է հասել ամերիկացի Ուեսլի Սոյի (2792) նկատմամբ:
Եզրափակիչի ուղեգրի հետ Արոնյանը նաև ստացավ 2018թ. մարտին Բեռլինում կայանալիք աշխարհի չեմպիոնի հավակնորդների մրցաշարի մասնակցության իրավունք:
Եզրափակիչը կմեկնարկի սեպտեմբերի 23-ին:
