10-ամյա Արման Սիմոնյանը, ով մինչ այժմ ձեզ է ներկայացել, որպես դասական երգիչ, ինչպես նաև դուք նրան Էլինա Չոլախյանի հետ դուետով «Տիեզերք» երգով կարող եք հիշել «Մանկական եվրատեսիլ 2014»-ի հայաստանյան ընտրական փուլից, որոշել է զբաղվել նաև հաղորդավարությամբ:
-Արման, ինչպե՞ս որոշեցիր հաղորդավարությամբ զբաղվել:
Եվրոտեսիլի բազմազբաղ օրերից հետո, հաղորդում վարելու մի քանի առաջարկ ստացա, որի գաղափարը ինձ շատ դուր եկավ:«Լայմ» հեռուստաընկերության առաջարկը ընդունեցի, քանի որ հաղորդումը կապված է երեխաների հետ, այն կոչվում է «Sweet Baby», իսկ ես երեխաներին և այս ասպարեզի իմ ընկերներին շատ-շատ եմ սիրում ու սիրով ընդունեցի առաջարկը:
-Հնարավո՞ր է, որ մի օր որոշես թողնել երգն ու հանդես գաս որպես հաղորդավար:
Ո՛չ, քանի որ ես շատ եմ սիրում երգել: Հատկապես ինձ դուր է գալիս դասական երգն ու երաժշտությունը, չնայած երգում եմ նաև այլ ոճերում: Դասական վոկալի համար շատ շնորհակալ եմ Մաեստրո Տիգրան Մկրտչյանին, ով իմ առաջին ուսուցիչն է եղել և ներկայիս ուսուցչին՝ Լարիսա Մկրտչյանին:
-Մանկական եվրատեսիլից բացի էլ ի՞նչ մրցույթների ես մասնակցել :
Մասնակցել եմ մի շարք մրցույթների, բայց ամենակարևորները 2014թ-ի «Կովկաս» միջազգային մրցույթը, որի ժամանակ դասական երգով ես գրավեցի առաջին պատվավոր տեղը՝ արժանանալով ոսկե մեդալի և «Վերածնունդ» միջազգային մրցույթ-փառատոնը, որտեղ ևս մրցանակային տեղ եմ զբաղեցրել. երրորդ տեղ և արժանացել ժյուրիի համակրանքին:«Sweet Baby» հաղորդման շրջանակներում դու մենակ չես, և հանդես ես գալիս Միլենայի հետ:
- Հե՞շտ է քեզ համար ներկայանալ զույգով, թե նախընտրում ես ներկայանալ մենակ:
Ես դուետով հանդես գալու փորձ արդեն ունեմ, ու ինձ համար դժվար չէ ներկայանալ Միլենայի հետ: Միասին ավելի հետաքրքիր են անցնում նկարահանումները:
-Ի՞նչն է քեզ ամենաշատը դուր գալիս այս հաղորդման մեջ:
Ինձ դուր է գալիս, որ մեկ նկարահանման ընթացքում մենք տարբեր վայրեր ենք այցելում, օրինակ գրադարան, ժամանցի վայրեր, բնության գիրկ, որոնց մասին ես հետաքրքիր տեղեկություններ եմ հավաքում, ինչպես նաև շփվում եմ հայտնի մարդկանց երեխաների և այլ երեխաների հետ:
-Հաղորդավարությունը նոր է քեզ համար, և սովորաբար սկզբում մի փոքր դժվարություններ են լինում, իսկ քեզ մոտ այն ինչպես է ընթանում:
Դժվարություններ չկան, ամեն ինչ շատ հեշտ ու հետաքրքիր է անցնում, իսկ եթե ինչ-որ բան միանգամից չի ստացվում ինձ այդ հարցում օգնում են հաղորդման տնօրեն Արմեն Դիլանյանն ու պրոդյուսեր Նելլի Պողոսյանը:
-Հասցնո՞մ ես հաղորդավարությունն ու մնացած գործերդ համատեղել:
Այո, քանի որ, այն ինչ ես սիրով եմ անում, միշտ կարողանում եմ հասցնել:
-Արման, ինչո՞վ ես սիրում զբաղվել ազատ ժամանակ:Ազատ ժամանակ գիրք եմ ընթերցում, կիթառ եմ նվագում:
-Հանդիսատեսի համար ի՞նչ նորություններ ես պատրաստում:
Առաջիկայում մրցույթներ կան, որոնց պետք է մասնակցեմ, իսկ մյուս մտադրություններս ավելի ուշ կմատուցեմ անակնկալի տեսքով:
Հաջողություն մաղթենք Արմանին երգարվեստում ու հաղորդավարության մեջ:
Հեղինակ` Կարինե Գևորգյան