Իհարկե բարդ է կանխատեսելը, սակայն կարծում եմ, որ 2017-ից ԱՄՆ-ն առաջին տիկին չի ունենա։
Որոշված է։ Հանրապետականների թեկնածուն Թրամփն է, դեմոկրատներինը՝ Քլինթոնը։ Թեկնածուները պատրաստվում են վճռորոշ ճակատամարտին։ Այս փուլում սպսվում են հետաքրքիր զարգացումներ։ Նախ, թեկնածուները ներկայացնելու են իրենց փոխնախագահների թեկնածուներին։ Դա ավանդաբար տեղի է ունենում հուլիս-օգոստոս ամիսներին։ Կարծում եմ Թրամփը կին թեկնածու կներկայացնի՝ փորձելով բալանս ապահովել մյուս թեկնածուի ուժեղ կողմի հետ։ Այդ թեկնածուն կարող է լինել, ասենք նահանգապետ Նիքքի Հալլին։ Քլինթոնի պարագայում չեմ բացառում աֆրոամերիկացի թեկնածուի առաջադրումը, ի դեմս ասենք Մասսաչուսետսի նախկին նահանգապետ Դեվալ Պատրիկի։
Նախընտրական այս փուլը ամերիկահայերի համար կարևորվում է նրանով, որ հենց այս շրջանում են թեկնածուները փորձում նվաճել հայկական համայնքի ձայները։ Քլինթոնը հազիվ թե խոստանա ճանաչել Ցեղասպանությունը, քանի որ այդ խոստումը կեղծ կթվա։ Միանգամայն տրամաբանական հարց կառաջանա, բա ինչու՞ պետքարտուղար եղած ժամանակ չխոսեցիր այդ մասին, սակայն սենատոր եղած տարիներին աջակցել ես այս հարցին։ Թրամփն այս առումով առավել ազատ է և չի բացառվում, որ նա անդրադառնա Ցեղասպանության ճանաչման հարցին, խոստանալով՝ հետո խոստումը չկատարելու նկատառումով։
Իհարկե բարդ է այս փուլում կանխատեսումներ անելը, սակայն կարծում եմ, որ 2017-ից ԱՄՆ-ն առաջին տիկին չի ունենա։
