«Հաստատ խմելու ջուր ծախող մի ֆիրմայի հետ Ջրմուղը փող է սարքում»,-այսպես էր Երևանի Կենտրոնի 24-ժամյա ջրազրկման փաստին  ողջ օրվա ընթացքում արձագանքում մեր տարեց գործընկերներից մեկը, որն արդեն հաշիվը կորցրել էր, թե որերոդ «Նոյ»-ն էր գնում խանութից՝ խմելու, զուգարանի, ծաղիկները ջրելու  համար: 

Իմ երիտասարդ գործընկերը Ջրմուղի, այսինքն ՝ «Երևան Ջուր» ընկերության մասին ավելի վատ կարծիքի է, սակայն վստահ է, որ պետք է խելք ունենալ ջրազրկման միջոցով բիզնես անելու համար, իսկ  «Երևան Ջուր»-ի ղեկավարության խելքը այսքան տարիների ընթացքում չի օգնել նույնիսկ մայրաքաղաքում  24-ժամյա ջրամաակարարում ապահովել: 

Երիտասարդ գործընկերս, բնականաբար, փայլում է իր սարկազմով:

Իսկ երրորդ գործընկերը, որ իրավաբանությունով է տարված, ավելի պրագմատիկ է և  Կենտրոնի ջրազուրկ ողջ օրվա ընթացքում առաջարկում էր «դատի տալ»  «Երևան Ջուր»-ին, որ ամառվա այս շոգին մարդկանց զրկել է ջրից ու դրանից առաջ սահմանափակվել ինչ-որ հաղորդագրությամբ, որ տարածել է երևի հեռուստատեսությամբ կամ  լրատվամիջոցով, որ միայն իր ղեկավարությունն ու իրեն լիցենզիայի տված չինովնիկն է նայում կամ կարդում: 

«Երևան Ջուր»-ին դատի տալու գաղափարը ոչ միայն մյուս գործընկերներից, այլ մեր գրասենյակի հարևան ռեստորանի, սրճարանի ու հյուրանոցի տերերին դուր եկավ: 

Նրանցից մեկը նույնիսկ հիշեց,որ Ֆրանսիայում նման մի դեպքի առիթով ձեռներեցները հայց են ներկայացրել ջրամատակարարող ընկերության դեմ, փոխհատուցում ստացել ու նաև  որոշումով պարտադրել՝ ջրամատակարարման հաջորդ հնարավոր դադարեցումից առնվազն 3 օր առաջ տեղեկացնել բնակիչներին ու կազմակերպություններին: 

«Բայց դա Ֆրանսիայում....»,-հոգոց հանեց հարևաններից մեկն ու քթի մեջ ինչ-որ բառեր փնթփնթաց ... երևի ողջ օրը իրենց ջրից զրկողի հասցեին, որն, ի դեպ, ֆրանսիական  ընկերություն է:

«Նոր ես էդ բարձրաձայն ասացի ու իմը՝ վեցհարկանի էր....»,-ժպտաց կողքից դույլով ջուր տանող  տարեց կինը:

Ու բոլորս մոռացանք «Ջրմուղին» դատի տալու  մասին, բավարարվեցինք հայհոյելով՝ նայած ով որ հարկ էր ջուր բարձրացնում  ու գոնե առավոտյան ջուր ունենալու ակնկալիքով:

Հ.Գ. 

Խորհուրդ  «Երևան Ջուր»-ին՝  աշխատանքները գիշերն իրականացրեք՝ թեկուզ ձեր աշխատակիցներին կրկնակի վճարելով  ու քաղաքացիների նյարդերի հաշվին ձեր գումարները մի խնայեք:

Հեղինակ՝ 

Ատոմ Գրիգորյան