Նիկոլ Փաշինյանը բրիտանական ԶԼՄ-ներին տված հարցազրույցում ասել է․ «Կարծում եմ, որ սահմանազատման գործընթացում արդեն իսկ այսօր կայացվող որոշումներով մենք ցույց ենք տվել մեր անկեղծությունը:

...Կառավարությունը պատրաստ է իր իրավասության շրջանակներում քայլեր ձեռնարկել, որպեսզի ադրբեջանական այն գյուղերում, մասնավորապես 4 գյուղերի մասին է՝ Ղըզըլհաջիլի, Խեյրումլի, Աշաղը Ասկիպարա, Բաղանիս-Այրում, որ այդ գյուղերում, որտեղ հիմա մարդիկ չեն ապրում, այդտեղ մարդկանց կյանքը հնարավոր դառնա, ապրելը հնարավոր դառնա»,- հայտարարել է Փաշինյանը։
Նա նաև հույս է հայտնել, որ այդ նույն պրոցեսի արդյունքում պետք է նույնքան հնարավոր դառնա մարդկանց կյանքն առանց սթրեսների Հայաստանի Հանրապետության՝ Բաղանիս, Ոսկեպար, Կիրանց, Բերքաբեր գյուղերում։
«Ես հավատում եմ, որ ավելացնելու է հավատը խաղաղության նկատմամբ՝ և՛ Հայաստանի հանրության, և՛ Ադրբեջանի հանրության շրջանում, և՛ ի վերջո նաև վստահության որոշակի պաշար է կուտակելու։ Եկեք արձանագրենք, որ խորը անվստահություն կա: Նաև ուզում եմ գնահատանքի խոսքեր ասել սահմանազատման հարցերով հանձնաժողովների անդամների և երկու համանախագահների կատարած աշխատանքի մասին, որոնք փորձում են մոլեկուլ առ մոլեկուլ վստահություն կառուցել, որին խնամքով վերաբերվելու դեպքում դա կարող է զարգանալ, խնամքով չվերաբերվելու դեպքում կարող է փլուզվել։ Այդ հանձնաժողովները ղեկավարում են Հայաստանի կողմից՝ փոխվարչապետ Մհեր Գրիգորյանը, Ադրբեջանի կողմից՝ փոխվարչապետ Շահին Մուստաֆաևը»,- ասել է Փաշինյանը։

«Ռուսաստանը նունպես Հարավային Կովկասում իր հարաբերությունները դիվերսիֆիկացնում է և դա սկսել է մեզնից առաջ: Եվ ՀԱՊԿ-ի խնդիրը ծագել է այդտեղից: Որովհետև հիմա ՀԱՊԿ-ում 2020 թվականի պատերազմից էլ առաջ ՌԴ-ն հավասարահեռ քաղաքականություն է վարում Հայաստանի և Ադրբեջանի միջև: Ուզում եմ նշել, որ մեր տարածաշրջանում հարաբերությունների դիվերսիֆիկացման քաղաքականությունը մեկնարկել է Ռուսաստանի կողմից: Եթե, օրինակ, մինչև 2012-13 թթ. ՌԴ-ի քաղաքականությունն այն էր, որ ՀՎ Կովկասում ՀՀ-ն ՌԴ-ի դաշնակիցն է, Ադրբեջանը` գործընկերը, ապա դրանից հետո իրավիճակը փոխվել է»,- բրիտանական լրատվամիջոցների ներկայացուցիչների հետ հանդիպմանն ասաց վարչապետ Փաշինյանը: Նա ընդգծեց, որ 2022 թ-ի փետրվարին Ռուսաստանը և Ադրբեջանը միասին ռազմավարական գործընկերության հռչակագիր ստորագրեցին և ըստ էության հենց այդ հռչակագրում արձանագրվում է քաղաքականությունների համաձայնեցման անհրաժեշտությունը:

***