«Մինչև Գերմանիա տեղափոխվելը Հենրիխ Մխիթարյանը պետք է ստանար իր իսկ վաստակած գումարը՝ 2 մլն դոլարի չափով, բայց Ռուբեն Հայրապետյանը որոշել է ինքնուրույն տնօրինել այդ գումարը և Մխիթարյանի կամքով կամ նրա կամքին հակառակ, նրան տվեց բաժնեմաս Զարգացման բանկում և դրանով փակեց պարտքի թեման: Այսինքն, Մխիթարյանը դարձավ «ակամա» բաժնետեր Զարգացման բանկում, և դեռ հարց է ՝ արդյունքում նա շահեց, թե կորցրեց»,- այս տեղեկությունը Asekose.am-ին է տրամադրել ընթերցողներից մեկը` խնդրելով պարզաբանում ստանալ:
Այս հարցի վերաբերյալ Asekose.am-ը զրուցեց նախ ՀՖՖ նախագահի խորհրդական Արայիկ Մանուկյանի հետ, սակայն վերջինս ասաց, որ ինքը նման տեղեկությունները ոչ հերքող է, ոչ էլ հաստատող ` նշելով, որ պարզաբանում ստանալու համար դիմենք ՀՀՖ նախագահ Ռուբեն Հայրապետյանի մամուլի քարտուղար Հայկ Կարապետյանին:
Հավելենք, որ «Զարգացման Հայկական Բանկ»-ի պաշտոնական կայքում «Մեր մասին» հատվածում Հենրիխ Մխիթարյանի բաժնետեր լինելու մասին որևէ տեղեկություն չկա: Բանկի բաժնետոմսերի նշանակալից սեփականատերեր են հանդիսանում Ռուբեն Հայրապետյանը (19.98%), Ռաֆիկ Հայրապետյանը (19.52%) և Գրիգոր Տերմենջյանը (16.03%):
Ռուբեն Հայրապետյանը նաև «Զարգացման Հայկական Բանկ»-ի տնօրենների խորհրդի նախագահն է:
«Բանկը բաց բաժնետիրական է, այսինքն` բաժնետերերի թիվը շատ ավելին կարող է լինել, սակայն նշված են միայն երեք մեծաքանակ բաժնետերերի անունները: Բոլորի անունները նշել հնարավոր չէ»,-Asekose.am-ին փոխանցեցին «Զարգացման Հայկական Բանկ»-ից :
Իսկ այն հարցին, թե որքանո՞վ է համապատասխանում իրականությանը, որ Հենրիխ Մխիթարյանը բաժնետեր է դարձել, նշեցին հետևյալը.
«Այդ տեղեկությունը ոչ հերքում ենք, ոչ հաստատում»:
Հեղինակ` Ատոմ Գրիգորյան
