Շատերն էին զայրացել, երբ «Բիլայն»-ի գովազդի ահռելի ցուցանակը տեսել էին Երևանի կենտրոնում գտնվող շենքի վրա, որը պահպանվում է պետության կողմից:

Այն, ի վերջո,  հեռացվեց մտահոգ քաղաքացիների ու լրագրողների բողոքից հետո:

«Բիլայն»-ը  դրանից հետո պարզաբանում ներկայացրեց, թե պաստառը հեռացրել է՝ իր բաժանորդների բողոքին արձագանքելով: 

Այդ փաստի առիթով բազում բողոքողներ գիտեմ ու նաև անձամբ ես՝ վաղուց  «Բիլայն»-ի բաժանորդը չեմ, սակայն հատկապես ինձ հետաքրքիր է՝ ինչու՞ «Բիլայն»-ը  չի կարողանում բաժանորդների ու Երևանի, Հայաստանի մասին մտածել մինչև որոշումներ կայացնելը: 

Ինձ նաև անչափ հետաքրքիր է ՝ էլ ի՞նչ որոշումներ են կայացնում  «Բիլայն»-ի  պատասխանատուները Երևանում ու նրանց գլխավոր գրասենյակում, որին տեղյակ չեն հայաստանյան բաժանորդները: 

Օրինակ ՝ ինչպե՞ս էին  արձագանքում  ադրբեջանցիների պահանջին՝ ըստ որի ռուսական «Վիմպելկոմ» ընկերությունը (ապրանքային նշանը՝ «Բիլայն») պետք է Լեռնային Ղարաբաղում դադարեցնի իր գործունեությունը: 

Կամ՝ ինչպե՞ս են արձագանքում սպառողների բողոքներին ու ահազանգներին, ովքեր կասկածում են իրենց  քաղաքային ու բջջային հեռախոսահամարների հաշիվներին , իսկ դրանք ստուգելու համար ՝ միշտ բախվում են այնպիսի բյուրոկրատական քաշքշուկների հետ, որ ստիպված հրաժարվում են իրենց իրավունքները պաշտպանելու ու կասկածները հստակեցնելու մտքից: 

Վերջերս, Asekose.am-ին տեղեկություններ հասան, որ «Բիլայն»-ը մտադիր է զգալի կրճատել Հայաստանում սոցիալական ծրագրերին ուղղված ու բարեգործական նպատակներով նախատեսված ծախսերը:

Ըստ ասեկոսեների՝ «Բիլայն»-ում «իրար մեջ շշնջում են», թե  այս որոշումը պայմանավորված է բաժնետերերի շարքում ազգությամբ թուրք ներդրողի հայտնվելը, ով չի ցանկանում  իր բիզնեսից գումարներ հատկացնել՝ Հայաստանում   բարեգործական ծրագրերին:

Եթե այդպես է՝  գուցե հայաստանցինե՞րն  էլ հստակեցնեն իրենց վերաբերմունքը, քանի որ այդ բիզնեսն ու նրա ծաղկուն ընթացքը հենց բաժանորդներն են ապահովում: 

Իսկ եթե այդպես չէ՝ ուրեմն՝ վատ է, որ «Բիլայն»-ը,  բարեգործության վրա գումարներ խնայելու հարցում, խորամանկ «տրյուկ» է օգտագործում: 

Ամեն դեպքում,  հիշեցնելով ռուսական ներդրումով Հայաստանում գործող բանկի՝ ադրբեջանցի սեփականատիրոջ հետ կապված աղմկահարույց պատմությունը, կարծում եմ, որ բաժանորդներն իրավունք ունեն պարզելու իրենց մտահոգող լուրերն ու ասեկոսեները... Բաժանորդներ,  որոնք ինչ-որ մեկին  հարստացնելուց առավել ցանկանում են, որ  օտարերկրա ընկերությունները նաև իրենց «սոցիալական պարտքի» զգացողությունն ունենան մեր հայրենիքի, հայ մարդկանց խնդիրների հանդեպ ու մեզ հետ անկեղծ լինեն: 

Հուսով, որ մեր այս հրապարակման առիթով «Բիլայն»-ի արձագանքը չի ուշանա, խոստանում ենք այն պարտաճանաչորեն ներկայացնել նաև Asekose.am-ում:

Հեղինակ՝ 

Ա. Գրիգորյան