Իսրայելը համաձայնել է Իրանի հետ երկկողմանի հրադադար կնքելու վերաբերյալ ԱՄՆ նախագահ Դոնալդ Թրամփի առաջարկին, քանի որ հասել է իր «գործողության նպատակներին»։ Այս մասին ասվում է Իսրայելի կառավարության հայտարարության մեջ։

«Գործողության նպատակներին հասնելու լույսի ներքո և նախագահ Թրամփի հետ լիակատար համակարգմամբ՝ Իսրայելը համաձայնել է երկկողմանի հրադադար կնքելու վերաբերյալ ԱՄՆ նախագահի առաջարկին։

Իսրայելը վճռականորեն կարձագանքի հրադադարի ցանկացած խախտմանը»,- ասվում է հայտարարության մեջ։

«Իսրայելի պաշտպանության ուժերը լիակատար վերահսկողություն են հաստատել Թեհրանի օդային տարածքի նկատմամբ, լուրջ վնաս են հասցրել ռազմական ղեկավարությանը և ոչնչացրել Իրանի կենտրոնական կառավարության տասնյակ օբյեկտներ»,- հայտնել է Իսրայելի վարչապետ Նեթանյահուի գրասենյակը։

Իսրայելի Պաշտպանության նախկին նախարար Ավիգդոր Լիբերմանը հայտարարել է, որ հրադադարի դեպքում շատ ավելի վատ վիճակ է ստեղծվում Իսրայելի համար և որ հրադադարն առանց հստակ համաձայնության 2-3 տարի հետո կբերի նոր պատերազմ։

«Իրանի դեմ պատերազմում Իսրայելի պաշտպանության բանակի և Մոսադի անհավանական ռազմական նվաճումների ֆոնին վերջին ակորդը հնչում է հատկապես կոշտ և դառը։ Անվերապահ հանձնվելու փոխարեն աշխարհը մտել է դժվար և ձանձրալի բանակցությունների մեջ, և այաթոլլահի ռեժիմը չի պատրաստվում զիջել ո՛չ իրանական հողի վրա ուրանի հարստացման, ո՛չ բալիստիկ հրթիռների արտադրության և հագեցման, ո՛չ էլ տարածաշրջանում և ողջ աշխարհում ահաբեկչության աջակցության և ֆինանսավորման հարցերում։ Պատերազմի սկզբում ես զգուշացրել էի, որ առյուծին վիրավոր թողնելուց ավելի վտանգավոր բան չկա։ Հստակ և միանշանակ համաձայնագրի բացակայության դեպքում երկու կամ երեք տարի անց հրադադարը հաստատ մեզ կտանի նոր պատերազմի՝ շատ ավելի վատ պայմաններում»,- ասել է Լիբերմանը։

***

ԱՄՆ նախագահ Դոնալդ Թրամփը NBC News-ի հետ զրույցում հայտնել է իր ակնկալիքները, որ Իսրայելի և Իրանի միջև երկուշաբթի հայտարարված հրադադարը կտևի «հավերժ»։

«Կարծում եմ՝ հրադադարն անժամկետ է։ Այն հավերժ կտևի»,- ասել է նա։

Իրանի և Իսրայելի միջև հրադադարն ուժի մեջ է։ Կողմերը չպետք է խախտեն այն։ Այս մասին գրառում է կատարել ԱՄՆ նախագահ Դոնալդ Թրամփը՝ Truth Social սոցցանցի իր էջում։

Ավելի վաղ նա հայտարարել էր, որ Իրանի և Իսրայելի միջև համաձայնություն է ձեռք բերվել 12 ժամվա ընթացքում լիարժեք և ամբողջական հրադադարի մասին, սակայն հակամարտող կողմերը չեն հաստատել դա։

Իրանի և Իսրայելի միջև հրադադարի կամ ռազմական գործողությունների դադարեցման մասին համաձայնագիր գոյություն չունի։ Այս մասին հայտարարել է Իրանի արտգործնախարար Աբբաս Արաղչին։

«Սակայն, եթե իսրայելական ռեժիմը Թեհրանի ժամանակով ժամը 4-ից սկսած դադարեցնի իր ապօրինի ագրեսիան Իրանի ժողովրդի դեմ, մենք նպատակ չունենք շարունակել մեր պատասխան գործողությունները։ Մեր ռազմական գործողությունների դադարեցման մասին վերջնական որոշումը կընդունվի ավելի ուշ»,- հայտնել է Արաղչին։

Նշենք՝ իսրայելական կողմից հրադադարի մասին հայտարարություն դեռ չի եղել։

Ավելի ուշ Իրանի ԱԳՆ-ն հայտնել է. «Իր ագրեսիայի համար Իսրայելին պատժելու մեր հզոր զինված ուժերի ռազմական գործողությունները շարունակվել են մինչև վերջին րոպեն՝ առավոտյան ժամը 4-ը»։

Ավելի վաղ Սպիտակ տան բարձրաստիճան պաշտոնյան CNN-ին հայտնել էր, որ Իսրայելը համաձայնել է ԱՄՆ նախագահ Դոնալդ Թրամփի կողմից հայտարարված հրադադարին՝ այն պայմանով, որ Իրանը դադարեցնի իր հարձակումները։ Ըստ աղբյուրի՝ Թեհրանը համաձայնել է այդ պայմանին։