Թարմացված․ «Քարտեզների ընտրությունն ամենաբարդ խնդիրն է, որին պետք է հասնել բանակցությունների ընթացքում, որովհետև կան բազմաթիվ քարտեզներ և քարտեզներն էլ անընդհատ փոփոխման կարիք են զգում»,- այսօր ԱԺ-ում ասել է պաշտպանության և անվտանգության հարցերի մշտական հանձնաժողովի նախագահ, ՔՊ-ական Անդրանիկ Քոչարյանը։ «Հիմա պետական սահման գծելու ծրագիր է իրականացվում՝ հատվածական, այս ընթացքում թեման այնքան քարտեզները չեն, ինչքան շահարկելը, որ Հայաստանն իր տարածքներից զիջում է։ Հայաստանը զիջելու ոչինչ չունի, Հայաստանի գործող իշխանությունները շարժվում են պարզ սկզբունքով․ այն ինչ-որ մերն է՝ մերն է, բայց էդ «մեր»-ը պետք է արձանագրել երկկողմանի համաձայնագրի շրջանակներում։ Եթե շարժվում ենք Ալմա-Աթիի հռչակագրի տրամաբանությամբ, այդ հռչակագիրն էլ պետք է ունենա իր քարտեզը։ Մի պահ Ադրբեջանը համաձայն էր 1976 թվականի քարտեզները վերցնել որպես հիմք, բայց մեզ համար կան ավելի շահեկան քարտեզներ, օրինակ 1926 թվականինը։ Քարտեզի փնտրտուքը և գտած քարտեզի արձանագրումը հողի վրա կբերի խաղաղության»,- ասել է Քոչարյանը՝ հավելելով, որ դեռ ճանապարհ կա անցնելու՝ երկու երկրների միջև իրավական փաստաթուղթ ունենալու համար՝ հաստատելով, թե որն է մեր տարածքը, որը՝ իրենցը։

Թարմացված․ Տարածքները՝ տարածքներ, բայց այդտեղ մարդիկ են ապրում, հետաքրքիր է՝ այդ մարդկանց իրենց բնակավայրերից հանելու գործընթացն ինչպե՞ս է իրականացվելու, Տավուշի մարզից հանձնվող տարածքների վերաբերյալ լրագրողի հարցին հարցով պատասխանեց ԱԺ պաշտպանության և անվտանգության հարցերի մշտական հանձնաժողովի նախագահ, ՔՊ-ական Անդրանիկ Քոչարյանը․ «Հիմա ինչի՞ ա այս հարցը ձեզ մոտ առաջացել, էդ վախը ո՞վ ա ա դրել ձեր մեջ, որ այդպիսի իրավիճակ կա այս պահին, կամ կարող է լինել։ Եթե էդպիսի իրավիճակ լինի, բնականաբար պետությունը դա սպասարկելու բոլոր անվտանգային միջոցառումներն անելու է»,- ասաց Քոչարյան՝ վստահեցնելով, որ գյուղեր չեն հանձնվում, մարդիկ շարունակելու են ապրել այնտեղ, որտեղ միշտ ապրել են։