Մինչ նախընտրական քարոզչական անցուդարձը, ֆեյսբուքում բուռն քննարկումների տեղիք տվեց Վիեննա մեկնող օդանավի ուղեւորներից մեկի՝ Տարոն Առաքելյանի գրառումն այն մասին, որ Րաֆֆի Հովհաննիսյանն ինքնաթիռում փրկել է 60-ամյա օտարկերկրացի մի տղամարդու կյանք՝ նրան արհեստական շնչառություն տալով եւ սիրտը ռիթմիկ մերսելով:
Տարաբնույթ մեկնաբանություններ եղան, որ Րաֆֆի Հովհաննիսյանի PR-ն էր դա, որ սարքած է եւ այլն:
Առավոտ.am-ն այս առնչությամբ զրուցել է այդ միջադեպի անմիջական ականատեսի՝ Գայանե Ավետիսյանի հետ՝ պարզելու, թե իրականում ինչ էր կատարվել նոյեմբերի 7-ին Վիեննա մեկնող օդանավում եւ ինչպես է հաջողվել Րաֆֆի Հովհաննիսյանին, չունենալով բժշկական կրթություն, վերակենդանացնել գետնին անշնչացած ընկած մարդու:
Գայանեի պատմելով՝ «Մենք աղջկաս հետ մեկնում էինք Վիեննա՝ ընկերների մոտ հանգստանալու: Այնպես ստացվեց, որ ինքնաթիռում պատահական նկատեցինք Րաֆֆի Հովհաննիսյանին, ընդ որում, պարզվեց, որ ինքը նստում էր հենց մեր կողքին՝ մեր շարքում: Երբ ինքնաթիռն արդեն վերելք էր կատարում, այդ պահին դիմացից մի տղամարդ բարձրացավ եւ փորձեց դուրս գալ այն պահին, երբ ամրագոտիները պետք է կապեինք: Ինքն արձակեց ամրագոտին եւ դուրս եկավ միջանցք եւ հենց միջանցքում վայր ընկավ: Այդ պահին բորտ ուղեկցորդուհիները խառնվեցին իրար, սկսեցին բղավել՝ is there a doctor, is there a doctor?: Մինչ նրանք բժիշկ էին ման գալիս, Րաֆֆի Հովհաննիսյանն արդեն ծնկաչոք օգնություն էր ցուցաբերում»:
Գայանեն ասել է, որ Րաֆֆի Հովհաննիսյանին մինչ այդ միայն հեռուստատեսությամբ է տեսել եւ անձամբ չի ճանաչել:
Ականատեսը նկարագրել է, թե ինչպիսի խուճապ է ստեղծվել այդ պահին օդանավում, երբ տեսել են ուշագնաց տղամարդուն. «Բորտ ուղեկցորդուհիները սփրթնեցին՝ բառի բուն իմաստով, չգիտեին ինչ անել: Գոռում էին՝ ինչ-որ մեկը կա՞ իրենց օգնի, բայց մասնագետ չկար, որ օգներ: Մինչ նրանք գոռում էին, Րաֆֆին արդեն օգնություն էր ցուցաբերում, այ դա էր ինձ համար հետաքրքիր, որ նա ծնկաչոք էր: Ես չհասկացա, թե ինչքան տեւեց դա: Մարդն ուշագնաց էր՝ առանց զարկերակի, առանց շնչելու եւ իհարկե, տեղիք կար անհանգստանալու: Պանիկա էր ստեղծվել, բայց Րաֆֆին իրեն չկորցրեց: Երբ որ նա սկսեց անել սրտի մերսում, արհեստական շնչառություն տալ, ես չհասկացա այդ պահին, թե դա ինչքան տեւեց, ժամանակի զգացողությունը կորցրել էի: Բայց ի վերջո այդ մարդու զարկերակը սկսեց աշխատել, մարդը սկսեց շնչել: Ժողովուրդը, որ նստած էր սրահում, ոնց որ հոլիվուդյան ֆիլմերում քիչ մնաց վեր կենար, ամրագոտիներն արձակեր եւ ծափահարեր»:
Անձամբ Գայանեն չի համբերել եւ մոտեցել, սեղմել է Րաֆֆի Հովհաննիսյանի ձեռքը: Ականատեսը պատմում էր, որ Րաֆֆի Հովհաննիսնանը միջադեպից անմիջապես հետո գլուխը թեքել եւ հանգիստ քնել է՝ թույլ չտալով որ մարդիկ մոտենան, իրենց շնորհակալությունը հայտնեն: Միայն մի պահ Գայանեն նկատել է, թե ինչպես են ավստրիացի բորտ ուղեկցորդուհիները երախտագիտությունից շոյել Րաֆֆի Հովհաննիսյանի ուսերն ու ասել՝ «thank you»:
Ինչ վերաբերում է PR անելուն՝ Գայանե Ավետիսյանի խոսքերով՝ «այսինքն, ինքը էդ անգլիացուն գումար էր տվել, որպեսզի ինքը վատանար, ընկներ ու արհեստական մերսումո՞վ այնտեղ զբաղվեր: PR-ն այսպե՞ս են հասկանում, հա՞: Իհարկե, անհեթեթություն է: Անկեղծ էր ամեն ինչն ու շատ բնական»:
Տիկին Գայանեն համոզված է, որ հատկապես կինը ծրագրերով չի ընտրում, բանավեճեր դիտելով չի ընտրում, ընտրում է սրտով ու «եթե այդ մարդը վերակենդանացրեց անծանոթ մի մարդու, ես մտածում եմ, գուցե նման մարդը, լինելով նախագահ, կկարողանա վերակենդանացնել եւ մեր երկիրը»:
Ի դեպ, ավելի ուշ պարզվել է, որ նույն օդանավում եղել են նաեւ «Ազատ դեմոկրատների» նախագահ Խաչատուր Քոքոբելյանը եւ նույն կուսակցության անդամ Ալեքսանդր Արզումանյանը, որոնք, սակայն, ի տարբերություն Րաֆֆի Հովհաննիսյանի, «էկոնոմ կլասսով» չեն ուղեւորվել ու մասնակից չեն եղել միջադեպին:
Տեսանյութը` Առավոտ.am-ի:
