Երևանի ավագանին երեկ ընդունեց 150 դրամ արժողությամբ ուղևորատոմսի մասին որոշումը, համաձայն որի այսօրվանից գործում է մեկ ուղևորության համար սահմանված 150 դրամ արժեքը:

Հիշեցնենք՝ մնացած բոլոր փաթեթները շարունակում են գործել նույն արժեքներով, միայն հունվար և փետրվար ամիսներին գնված փաթեթների դեպքում դրանք կգործեն հավելյալ 30 օր տևողությամբ:
«Մայր Հայաստան» խմբակցությունը շաբաթներ շարունակ կոչ է անում բոյկոտել ուղեվարձի թանկացումը։ Խմբակցության անդամներն այսօր վաղ առավոտից անհնազանդության ակցիաներ են կազմակերպել՝ քաղաքացիներին հորդորելով ձեռք չբերել թանկ փաթեթները և չվճարել 150 դրամ։ Դաշինքի առաջնորդ Անդրանիկ Թևանյանը հայտնել էր, որ իրենք 17000 քաղաքացիների ստորագրությամբ օրենքի նախագիծ ունեն, որը եթե ավագանին ընդունի, ապա ուղեվարձը ոչ միայն կլինի 100 դրամ, այլ որոշ դեպքերում կլինի նաև ավելի մատչելի։ «Բոյկոտելու ենք այնքան ժամանակ մինչև մեր նախագիծը մտնի ավագանու օրակարգ»,- ասել էր Թևանյանը։
«Քաղաքացիները աանց վճարելու երթևեկում են, համախմբված բոյկոտում են»,- ֆեյսբուքյան ուղիղ եթերումասաց խմբակցության անդամ Գևորգ Ստեփանյանը՝ նշելով, որ վարորդները խնդիր չեն առաջացնում։

***