«Այս պահին Ռուսաստանի նախագահ Վլադիմիր Պուտինի պաշտոնական այց Հայաստան չի նախապատրաստվում, և նման քննարկումներ ներկա պահին չեն ընթանում»,- երեկ «Հայկական ժամանակ»-ի թղթակցին հայտնել են Ռուսաստանի նախագահի մամուլի ծառայությունից:

Այս կերպ ՌԴ նախագահի մամլո ծառայությունը պատասխանել է թերթի թղթակցի խնդրանքին` մեկնաբանել «տեղեկությունները, թե մինչև 2013 թվականի փետրվարին ՀՀ-ում կայանալիք նախագահական ընտրությունները նախատեսվում է Վլադիմիր Պուտինի այցը Հայաստան»: Նույն հարցին ի պատասխան` ՀՀ-ում ՌԴ դեսպանատնից «ՀԺ» թղթակցին ասել էին, որ Պուտինի այցի վերաբերյալ տեղեկատվության չեն տիրապետում և խորհուրդ են տվել դիմել ՌԴ նախագահի մամլո ծառայություն: Դեռ ամռանը ԱՊՀ երկրների ինստիտուտի տնօրեն Կոնստանտին Զատուլինն ասել էր, թե ՀՀ-ում ՀԱՊԿ զորավարժություններին մասնակցելու համար սեպտեմբերի 7-ին Պուտինը ժամանելու է ՀՀ: Զորավարժությունները մոտ 2 շաբաթով հետաձգվեցին, իսկ Պուտինն այդպես էլ չեկավ: