Ամենայն Հայոց Կաթողիկոս Գարեգին Բ-ն, Մայր Աթոռ Սուրբ Էջմիածնի միաբանների ուղեկցությամբ, այցելեց Ծիծեռնակաբերդի հուշահամալիր։ Կատարվեց Հայոց Ցեղասպանության սուրբ նահատակների բարեխոսական կարգ:

«Ոգեկոչում ենք Հայոց ցեղասպանության 110-րդ տարելիցը` Արցախում մեր ժողովրդի հանդեպ իրագործված ցեղասպանական գործողությունների, արցախյան կորուստների ցավը մեր սրտում»,- Ծիծեռնակաբերդում լրագրողների հետ զրույցում ասաց Ամենայն հայոց կաթողիկոսը։ «Ծիծեռնակաբերդի նվիրական այս բարձունքում մեր հոգևորականների և մեր զավակների հետ աղոթք բարձրացրինք առ Աստված, որ Տերը զորացնի մեր ժողովրդին` իր հոգու ցավն ու տառապանքը ուժի վերածելու, հաղթահարելու մեր կյանքում առկա դժվարությունները և նորանոր իրագործումներով շենացնելու հայրենական մեր երկիրը, կերտելու մեր ժողովրդի պայծառ ու լուսավոր կյանքը»,- ասաց Վեհափառը՝ չպատասխանելով լրագրողների հարցերին, մասնավորապես, թե ինչո՞ւ այլևս երկրի ղեկավար կազմի հետ չի այցելում Ծիծեռնակաբերդի հուշահամալիր։