«Տիրան Խաչատրյանը գեներալի ուսադիրները մինչև Նիկոլ Փաշինյանի իշխանազավթումն է ստացել: Ազգային հերոսի կոչում ստացել է այն ժամանակահատվածում, երբ գնացել է առաջնագիծ և առաջնագծում ստացել է հրազենային վիրավորում»,- «Հայելի» ակումբում ասուլիսի ժամանակ ասաց ԱԺ «Հայաստան» խմբակցության պատգամավոր Գառնիկ Դանիելյանը՝ անդրադառնալով Տիրան Խաչատրյանի կալանավորմանը: «Մի օր կխոսվի նաև, թե ինչպիսի դերակատարում է ունեցել գեներալը 44-օրյա պատերազմում: Նա կանխել է ադրբեջանցիների առաջխաղացումը: Մեր գործընկեր Գեղամ Մանուկյանը հարցում էր ուղարկել ՊՆ, որտեղից ասել էին, որ Տիրան Խաչատրյանը չի վերցրել հերոսի կոչումը: Անգամ կապ են հաստատել իր հետ, որ ուղարկեն, բայց այդ մարդը հրաժարվել է վերցնել Նիկոլի ձեռքից»,- ընդգծեց Դանիելյանը և հավելեց, որ Նիկոլ Փաշինյանի դեմ դուրս գալուց հետո տարբեր քրեական գործեր են փորձել կպցնել Տիրան Խաչատրյանին. «Այդ մարդուն մի բանի համար են դատում, որ 2020թ-ից հետո ակտիվ Նիկոլ Փաշինյանին քննադատում է»,- ասաց Դանիելյանը:

Հիշեցնենք՝ 2023թ. հարցազրույցներից մեկի ժամանակ, լրագրողի հարցին՝ դեռևս 2020թ. հոկտեմբերին դուք Ազգային հերոսի, թերևս, ամենաբարձր պատվո կոչումին արժանացաք: Ինչո՞ւ պատերազմից հետո հետ չվերադարձրիք Փաշինյանի կողմից՝ ձեզ շնորհված Ազգային հերոսի կոչումը, ասել էր. «Բայց ես վերցրե՞լ եմ իրենց տված կոչումը, որ մի հատ էլ՝ հետ տայի, կամ ի՞նչ-որ մեկը դա ինձ տվե՞լ է, որ ես իմանայի, թե ո՞ւմ պետք է դա հետ տամ»։ Հարցին՝ այդ դեպքում՝ ո՞ւմ են տվել կամ որտե՞ղ է գտնվում ձեզ շնորհված Ազգային հերոսի կոչումը, պատասխանել էր. «Դա տվել են ոչ թե ինձ, այլ հանձնել են Պաշտպանության նախարարությանը։

Ես չեմ վերցրել...»: