«Խաղաղության հաստատումից հետո մեր շատ հայրենակիցներ ավելի ակտիվ են ձգտում ՀՀ-ում անշարժ գույք ձեռք բերել և կարևոր է, որ տեխնիկական հատվածները հնարավորինս մատչելի լինեն»,- այսօր Կառավարության նիստի ժամանակ ասաց վարչապետ Նիկոլ Փաշինյանը։
Նշենք, որ քննարկվում է «Գույքի նկատմամբ իրավունքների պետական գրանցման մասին» օրենքում լրացումներ և փոփոխություններ կատարելու մասին» նախագծը, համաձայն որի նախատեսվում է ներդնել թվային նոր գործիքակազմ՝ անշարժ գույքի վերաբերյալ առցանց գործարքներ կատարելու նպատակով։ «Ստացվում է՝ մարդը առանց տնից դուրս գալու կարող է տուն ձեռք բերել»,- ասաց Փաշինյանը։ Նա շեշտադրեց համակարգի անվտանգ լինելու կարևորությունը՝ նշելով, որ շատ դեպքեր են եղել, որ մարդիկ կեղծ լիազորագրերով տների առքուվաճառք են կատարել, թվային հարթակը պետք է վստահություն ներշնչի և լինի անվտանգ։

***

«Իհարկե, կան մարդիկ, որ Հայաստանից գնում են արտագնա աշխատանքի։ Բայց, ինչպես կարելի է նկատել անզեն աչքով, Հայաստան հիմնականում գալիս են արտագնա աշխատանքի, այսինքն՝ արդեն Հայաստան խոպան են գալիս»,- այսօր Կառավարության նիստի ժամանակ ասաց Նիկոլ Փաշինյանը՝ ցանկանալով ցուցադրել ՀՀ-ում տեղի ունեցող տնտեսական աճը։