Ռուսաստանի ըմբշամարտի միության նախագահ, ըմբշամարտի միջազգային ֆեդերացիայի մրցավարական կոմիտեի նախագահ Միխայիլ Մամիաշվիլին RUSARMINFO-ի հետ զրույցում իր տեսակետն է հայտնել հունահռոմեական ոճում հանդես եկող հայազգի ըմբիշների` Արթուր Ալեքսանյանի և Միհրան Հարությունյանի գոտեմարտերի մասին.
«Այն, ինչ տեղի ունեցավ Ռիոյում, հայ ժողովրդի համար կարելի է պատմական իրադարձություն համարել: Այն, ինչ արեցին հունահռոմեական ոճում հանդես եկող երկու ըմբիշները, պարզապես սենսացիա էր: Հայաստանը մրցում էր այնպիսի հզոր երկրների հետ, ինչպիսիք էին Ռուսաստանը, ԱՄՆ-ն, սկանդինավյան երկրները, Թուրքիան, Իրանը և այլն: Դուք ուզում եք հայ ըմբիշների գոտեմարտերը հաջող անվանե՞լ. ինձ համար դրանք պարզապես փայլուն էին: Ցանկանում եմ շնորհավորել ողջ Հայաստանին, իմ ընկերոջը` Լևոն Ջուլֆալակյանին, բոլոր ըմբիշներին»,- ասել է Մամիաշվիլին:
Տեղեկացնենք, որ Միխայիլ Մամիաշվիլին կայքի հետ զրույցում մեկնաբանել է նաև իրեն և Միհրան Հարությունյանին վերաբերող խոսակցությունը, ըստ որի` նա անձամբ է խոչընդոտում Միհրանի գործունեությանը, քանի որ վերջինս նախկինում ներկայացնում էր Ռուսաստանը:
Իսկ թե կոնկրետ ի՞նչ է ասել Միխայիլ Մամիաշվիլին տվյալ թեմայի շուրջ, կտեղեկացնենք վաղը:
Աղբյուրը` rusarminfo.ru
Կարդացեք նաև` Քանի ես կամ, դու չես հաղթելու. մաֆիան՝ ընդդեմ Միհրան Հարությունյանի
