Էրեբունու հիվանդանոցում եմ եղել ժամը 19-21-ը: Հեռվից նկատեցի զինվորական հագուստներով մարդկանց, նրանց մեջ էր նաև մի կին կապիտան, ափսոս անունը չիմացա, բայց որքան հասկացա նրանք այնտեղ էին վիրավոր զինվորների ծնողների համար հոգեբանական ծառայութուն կազմակերպելու նպատակով: Անչափ ողջունելի նախաձեռնություն է: 
Եկավ նաև ՀՀ պաշտպանության նախարարի տիկին Ռուզաննա Օհանյանը, ով զինվորներին այցելելուց հետո մոտեցավ ծնողներին և հատկապես Ռուբենի մայրիկին: Խոսեցին շա՜տ երկար,ես հեռվում էի և չլսեցի խոսակցությունը, բայց նկատեցի, թե ինչպես միասին հուզվեցին, իրար գրկեցին: Վստահ եմ, որ Ռուբենի մայրը՝ Անահիտը մի փոքր խաղաղվեց, թիկունքն ավելի ամուր զգաց, երբ լսեց տիկին Ռուզաննայի ջերմ խոսքերն ու հետևյալ նախադասությունը.<հնարավորն անելու ենք>: Այնտեղ միայն Անահիտը չէր, հավաքված բոլոր ծնողների հետ եղավ անմիջական ու անկաշկանդ զրույց, որը երկուստեք շատ կարևոր էր ու սփոփող:

Անահիտ Բախշյան