Բանաձև «Ժառանգություն» կուսակցության հերթական՝ 14-րդ համագումարի, 4 ապրիլի 2026, Երևան
 

Հիմք ընդունելով ազգային-ազատական արժեբանական դրույթները, հենվելով ծավալած գործունեության և հրապարակված քաղաքական հայտարարությունների վրա, արժևորելով «Ժառանգություն» կուսակցության հիմնադիր Րաֆֆի Կ. Հովհաննիսյանի հանրային խոսքն ու միջազգային հարթակներում կատարած հետևողական աշխատանքը՝ արձանագրում ենք:

Ա. Հայաստանի Հանրապետությունն ակնհայտ գոյութենական աղետի եզրին է՝ շարունակական տխեղծ հայրենատվության, նսեմացած ազգային ինքնագիտակցության և նպատակների, արդեն երեք տարի հայրենազրկված Արցախի, մեր ինքնության կարևորագույն վեմի՝ Հայ Առաքելական Սուրբ Եկեղեցու ոտնահարված իրավունքների, կորսված ու խեղված տասնյակ հազարավոր ճակատագրերի, միասնության՝ խաթարված, անարժեք, արհեստական համակարգերի տեղապտույտից այսդին:

Վերոընդգծյալը՝ և ոչ միայն, արդյունք և հետևանք է տակավին իշխող խմբակի անկարող անգործության, իսկ արդեն վերջին շրջանում` ակնհայտ հանցավոր, ժողովրդավարական արժեքների հետ աղերս չունեցող գործունեության: Սեփական վերարտադրության անասնական մոլուցքը տրորել է ամենը, ինչը կարևոր է՝ ժամանակը, ինքնությունը, ազգային միասնությունը, հավատը և արժանապատվությունը:

Բ. Պատուհասած գոյաբանական աղետը մինչև գալիք համապետական ընտրությունների պաշտոնական մեկնարկը մեզնից և քաղաքական տիրույթի հանձնառու միավորներից պահանջում է.

• հստակ մշակված, քաղաքական ճշգրիտ հաշվարկված հակազդեցության գործողություններ Հայրենիք-Սփյուռք համերաշխության պատվարի ներքո՝ համազգային համախմբման աներկբա արտահայտում,
• հայրենատվության հերթական արարների բացառման, արժանապատիվ խաղաղության և ստեղծարար-կենարար աշխատանքի համար համաշխարհային ամբողջական ռեսուրսների ներառում,
• հայկական Արցախում մեր հայրենակիցների անվտանգ և միջազգայնորեն երաշխավորված ապրելու իրավունքի առաջմղում:

Գ․ Մերժելով պետականության կազմաքանդմանն ուղղված քաղաքականությունը, հետամուտ՝ հայ մարդու և հայկականության խնդիրներին՝ «Ժառանգություն» կուսակցությունը որոշում է․

Չմասնակցել 2026թ. հունիսի 7-ին կայանալիք ՀՀ ԱԺ ընտրություններին։

Հաշվի առնելով ներքաղաքական առկա դասավորվածությունը, գնահատելով կուսակցության քաղաքական կապիտալն ու ռեսուրսները՝ աջակից է դառնում ազգային բարերար Սամվել Կարապետյանի շուրջ ձևավորված համազգային համախմբմանը՝ բացառելով անգամ աննշան մեղսակցությունը ազգակործան աննախադեպ արհավիրքի վերարտադրմանը:

Պատասխանատու ենք և պարտական՝ հային, հայրենիքին, Հայաստանի Հանրապետությանը:

Այսօր կայացել է «Ժառանգություն» կուսակցության 14-րդ համագումարը, որը կազմված էր ամբողջ հանրապետությունը ներկայացնող 120 պատվիրակից։

Քննարկվել են Հայաստանում, Արցախում և տարածաշրջանում տեղի ունեցող վերջին զարգացումները, վեր են հանվել ծառացած մարտահրավերները, ընտրվել է նոր ղեկավար կազմ, ընդունել է բանաձև, որն ընդգծում է «Ժառանգության» դիրքորոշումները քաղաքական իրադրության և առաջիկա խորհրդարանական ընտրությունների վերաբերյալ։

«Այսօր մենք հավաքվել ենք արդի հայոց պատմության ամենաօրհասական պահին՝ կապիտուլյացիայի և վերածննդի, հպատակեցման և ինքնիշխանության, ճակատագրապաշտության և քաղաքացիական ու ազգային իրավունքների սահմանադրական իրացման այս խաչմերուկում»,- ասել է ՀՀ առաջին արտգործնախարար, «Ժառանգություն» կուսակցության հիմնադիր Րաֆֆի Հովհաննիսյանը։

Համագումարի պատվիրակներն Անդրանիկ Գրիգորյանին վերընտրել են կուսակցության վարչության նախագահ, ընդունվել է «Ժառանգություն» կուսակցության 14-րդ համագումարի բանաձևը, հաստատվել են կանոնադրական փոփոխությունները։ Համագումարի աշխատանքներում ընդգծվել է «Ժառանգության» դերը ազգային կարևորագույն առաջնահերթություններում և հունիսի 7-ին կայանալիք ԱԺ ընտրություններում։

Վարչության նոր ընտրված անդամներն են՝ Տաթևիկ Գամաղելյանը (Երևան), Հասմիկ Պետրոսյանը (Գյումրի), Ստեփան Վարդանյանը (Գյումրի), Վահագն Բայրամյանը (Երևան), Վանիկ Ալեքսանյանը (Երևան), Գագիկ Մարգարյանը (Արմավիր), Դավիթ Գրիգորյանը (Երևան) և Րաֆֆի Հովհաննիսյանը։