a1plus.am-ի փոխանցմամբ՝ ԱԺ Տնտեսական հարցերրի հանձնաժողովն այսօր քննարկել է  նաեւ «Շրջանառության հարկի մասին» օրենքում կառավարության ներկայացրած նոր փոփոխությունները, որոնք գործադիրը կատարել էր՝ ՓՄՁ ներկայացուցիչների բողոքի ալիքից հետո:

Ֆինանսների փոխնախարար Վախթանգ Միրումյանը եւս մեկ անգամ տեղեկացրել է, որ տնտեսվարողների կողմից ապրանքների մասին տեղեկությունների ներկայացման ժամկետը այս տարվա հոկտեմբերրի մեկից հետաձգվել է 2015 փետրվարի 1-ը:

Օրենքի փոփոխությունները բուռն քննարկման առիթ է դարձել պատգամավորների համար: ՀԱԿ պատգամավոր Հրանտ Բագրատյանը նկատել է, որ գոյություն ունի փոքր ու միջին բիզնես, որտեղ չկա շահութահարկ ու ԱԱՀ, կա միայն շրջանառության հարկ. «Ի՞նչ է ՓՄՁ-ն: Դա լավ հասկանալու համար, պատկերացրեք՝ գոլ խփելու համար կա ֆուտբոլի դաշտ, չէ՞: Հիմա այդ մարդկանց ասում եք՝ ունեցեք ավելորդ փաստաթղթեր, պահեք հաշվապահ: Դուք այդպիսով ոչնչացնում եք փոքր բիզնեսը, այն դարձնում եք խոշոր: Եթե ՓՄՁ-ն ապրանքի ձեռքբերման թղթեր է ներկայացնում, նա դառնում է խոշոր»:

ԲՀԿ պատգամավոր Միքայել Մելքումյանը խնդրի լուծման համար առաջարկել է մեղմացնել հարկային ռեժիմները, որ եղած քիչ ՓՄՁ-ն էլ չփակվի. «Ստացվում է՝ պետական սահմանի վրա խոշոր բիզնեսի վարչարարությունը ստուգելու համար պատասխանատվությունը դնում ենք փոքրի վրա: ՓՄՁ-ից քիչ փաստաթղթեր ուզեք, որ այն բարգավաճի»: Այս տարբերակի հետ համամիտ չէր ԱԺ պատգամավոր Խաչատուր Քոքոբելյանը. «Այդպես բարգավաճելով՝ ստվերն են ավելացնելու»:

Հանձնաժողովի նախագահ Վարդան Այվազյանն ընդհատել է՝ ասելով, որ շատ ՓՄՁ-ներ ոչ թե փակվել են, այլ մտել են խոշորի դաշտ եւ ապա հիշեցրեց, որ այս օրենքի կիրարկումն արդեն հետաձգվել է, եւ ամեն ինչ կարգին է լինելու: «Հետո էլ՝ առաջ Աստված»,- նրա միտքը շարունակել է ՀՀԿ պատգամավոր Հակոբ Հակոբյանը: «Թե մի բան կա, ասեք, մենք էլ իմանանք, ի վերջո, իշխանություն եք, մի բան կիմանաք»,- կատակել է Հրանտ Բագրատյանը:

Վարդան Այվազյանը, եւս մեկ անգամ կարեւորելով այս օրենքի ընդունումը, պատճառաբանել է, որ նպատակն այն է, որ տնտեսվարողը «10 հազարանոց շուբան չբերի տասը դրամանոց մայկի տակ անցկացնի»:

Այնուհետեւ Վարդան Այվազյանը 30 րոպե ընդմիջում է խնդրել, սակայն ընդմիջումից հետո հանձնաժողովը չի շարունակել աշխատանքները: Պատգամավորների մի մասը քննարկումը շարունակել է նրա աշխատասենյակում: Քիչ անց նրանց է միացել նաեւ ԱԺ նախագահ Գալուստ Սահակյանը:

Առավել մանրամասն՝ սկզբնաղբյուր կայքում