«Շատ կարևորում եմ երկու երկրների հասարակությունների միջև իրականացվող տարբեր ծրագրերը՝ փոխադարձ վստահություն կառուցելու առումով: Իհարկե, դրանք մեկ գիշերում մարդկանց կարծիքը չեն փոխելու: Սակայն եթե երկարատև լինեն, միգուցե առաջընթացի հասնենք: Ինձ համար հետաքրքիր է, որ նույն այս քննարկումը լինում է նաև Ադրբեջանում: Եվ պետք չէ զարմանալ, որ սահմանի երկու կողմերում էլ կան լավ մարդիկ, ովքեր ուզում են հասնել խաղաղության և խաղաղ ապրել կողք կողքի»,- այս մասին այսօր մի քանի լրատվամիջոցների ներկայացուցիչների հետ հանդիպմանը ասաց ԵԱՀԿ Մինսկի խմբի ամերիկացի համանախագահ Ջեյմս Ուորլիքը:
Դիտարկմանը, թե Ադրբեջանում այնուամենայնիվ կա մեկը, ով խաղաղություն չի ցանկանում և դա Իհամ Ալիևն է, համանախագահը պատասխանեց.
«Ես համոզված եմ, որ երկու նախագահները ցանկանում են խաղաղության ուղի գտնել: Երկուսն էլ սիրում են իրենց երկիրը և երկուսն էլ ուզում են անել այն, ինչը լավ կլինի իրենց ժողովուրդների համար: Ես կասկած չունեմ, որ երկու նախագահներն էլ փորձում են այնպիսի լուծում գտնել, որը խաղաղություն կբերի: Դրա համար նրանք համաձայնեցին հանդիպել: Բայց պետք է հասկանալ, որ դեպի խաղաղություն տանող ուղին ուղիղ գիծ չէ, և հետընթացներ լինելու են այդ ճանապարհին: Այն ամենը, որ տեղի է ունեցել սահմանի վրա, հենց հետընթացներն են այդ ճանապարհի»:
Ի պատասխան հարցին՝ հնարավո՞ր է արդյոք, որ մի օր ԼՂՀ-ն մասնակցի բանակցային գործընթացին, ամերիկացի համանախագահն ասաց.
«Մենք գտնում ենք, որ շատ կարևոր է, որպեսզի ԼՂ դե ֆակտո իշխանությունների ձայնը լսելի լինի: Այդ պատճառով Մինսկի խմբի համանախագահները մեկնում են Ղարաբաղ, հանդիպումներ են ունենում դե ֆակտո իշխանություններ հետ, որպեսզի նրանց ձայնը լսելի լինի»:
Դիտարկմանը, թե ադրբեջանական կողմը ցանկություն չունի խաղաղություն հաստատելու: Եվ որ իրենց իսկ խոսքով՝ մարդու կյանքը նրանց համար նշանակություն չունի, Ջեյմս Ուորլիքը պատասխանեց.
«Մի քանի անգամ եղել եմ Բաքվում և ես համոզված եմ, որ որ երկու կողմերն էլ ուզում են խաղաղության ուղի գտնել: Ես համաձայն եմ, որ անվստահություն կա սահմանի երկու կողմերում, բայց համաձայն չեմ այն մտքի հետ, որ երկու ժողովուրդներն էլ չեն ուզում խաղաղության հասնել: Ես բազմիցս հանդիպել եմ նախագահ Ալիևի հետ և համոզված եմ, որ նա ուզում է խաղաղության ուղի գտնել: Համոզված եմ նաև, որ նախագահ Սարգսյանը ևս այդպես է ցանկանում: Հենց դա է պատճառը, որ նրանք հանդիպում են»:
Կարդացեք նաև՝
Քայլերը, որ կցանկանայինք տեսնել դեպի խաղաղություն տանող ճանապարհին, դեռ չենք տեսնում. Ուորլիք
Բանակցությունները պետք է դրվեն այլ մակարդակի վրա. հանդիպումները բավարար չեն. Ուորլիք
Հեղինակ՝ Հասմիկ Գյոզալյան
