Գյումրու ավագանու առաջիկա ընտրություններում ընդդիմադիր յուրաքանչյուր թեկնածու պետք է գրի-ստորագրի, որ չի անցնելու իշխանության կողմը, չի համագործակցելու։ Դեկտեմբերի 20-ի ասուլիսում, հանդես գալով օնլայն տարբերակով, հայտնեց «ԴՕԿ» կուսակցության նախագահ Վարդան Ղուկասյանը։
«Գյումրին ունի հատուկ կոլորիտ, դա Երևան չէ»,-ասաց նա՝ համոզմունք հայտնելով, որ Գյումրիում եթե ինչ-որ մեկը խախտի քաղաքական նախնական պայմանավորվածությունը, նա հետագայում այդ քաղաքից կվտարվի։
«Էստրա-օրդինար ժամանակները պահանջում են էստրա-օրդինար միջոցներ, մենք գործ ունենք էնպիսի մի քաղաքական համաճարակի հետ, որը կոչվում է «Քաղաքացիական պայմանագիր», և այդ համաճարակը ոչնչի առաջ կանգ չի առնում»,- նշեց Ղուկասյանը։
Նշենք, որ դեկտեմբերի 20-ին մի շարք ընդդիմադիր կուսակցություններ նախաձեռնել են ասուլիս՝ կապված Գյումրու կառավարման ճգնաժամի և արտահերթ ընտրությունների հետ։