Թուրքիայի արտաքին գործերի նախարար Ահմեթ Դավութօղլուն բավական ուշագրավ հայտարարություններ է արել Թուրքիայի ազգային մեծ ժողովի արտաքին հարաբերությունների հանձնաժողովի հետ հանդիպման ժամանակ: Գրում է «թուրքագիտական պորտալը» և հավելում.
Ինչպես տեղեկացնում է թուրքական «Աքշամ» պարբերականը, Թուրքիայի արտգործնախարարը նշել է, որ ներկայում աշխատանքներ են ընթանում Հայաստանի հետ սահմանային անցակետի բացման և երկաթուղային կապը վերականգնելու համար։
«2015 թվականին ընդառաջ մեր աշխատանքները շարունակվում են և վերջին փուլում են։ Մեր պահանջն է, որպեսզի հայերը դուրս գան Արցախից։ Սպասում ենք զարգացման այդ հարցում։ Եթե իրականացվի, և սահմանը կբացենք, և երկաթգիծը կգործարկենք, և հարաբերությունները կզարգացնենք։ Սակայն ցանկանում ենք սա անել Ադրբեջանի հետ համատեղ»,-նշել է Դավութօղլուն։
Նա նշել է, որ ներկայում իրենք աշխատանքներ են իրականացնում հայ-թուրքական սահմանային անցակետերը նախապատրաստելու և բացելու ուղղությամբ, իսկ առաջիկայում Ադրբեջան կատարելիք այցի ժամանակ անդրադարձ է կատարվելու այս թեմային։
«Եթե Ադրբեջանին համոզենք, մենք կարող ենք մի անակնկալ մատուցել։ Ներկայում աշխատում ենք սահմանային անցկակետի վրա»,-ըստ թուրքական աղբյուրի՝ նշել է Դավութօղլուն։
Նշենք, որ Թուրքիան այդպես էլ չվավերացրեց 2009 թվականի հոկտեմբերին Ցյուրիխում Հայաստանի հետ կնքված արձանագրությունները, որոնցով նախատեսվում էր դիվանագիտական հարաբերությունների հաստատում և սահմանի բացում։ Թուրքական կողմը որպես նախապայման և խոչընդոտ էր նշում Արցախյան հարցի կարգավորումը, ինչպես նաև ՀՀ Սահմանադրական դատարանի որոշումներն այդ փաստաթղթերի վերաբերյալ։
