Այսօր՝ հունվարի 15-ին, գողություն է տեղի ունեցել Երևանում։ Ժամը 10։30-ի սահմաններում Երևանի բնակիչ Էդգար Բ-ն ահազանգել է ոստիկանության Շենգավիթի բաժին և հայտնել, որ գիշերը անհայտ անձ կամ անձինք հատուկ տեխնիկական միջոցների գործադրմամբ կոտրել են Մայիսի 9 փողոցի 49 շենքի առաջին հարկում գործող «Ստելլար» գեղեցկության սրահի դուռն ու դռան հետևում տեղադրված ճաղավանդակի կողպեքը ու մտել ներս։
Ինչպես հայտնում է ֆոտոլրագրող Գագիկ Շամշյանը, գողության փաստով քննչական բաժնում նախաձեռնվել է քրեական վարույթ։
Շամշյանի տեղեկություններով՝ գողը կամ գողերը վարսավիրանոցից գողացել են մոտ 4000 ԱՄՆ դոլար արժողության մազահեռացման (էպիլյացիա) սարք և այլ պարագաներ։ Ընդհանուր առմամբ ՝ ստահակի կամ ստահակների կողմից վարսավիրանոցին պատճառվել է մոտ 5000 ԱՄՆ դոլարի վնաս։
Այդ վարսավիրանոցում նախկինում գործել է «Good Win», որտեղ 2014 թվականին տեղի էր ունեցել առանձնակի դաժանությամբ սպանություն և կողոպուտ։ Այդ հանցագործությունը ոստիկանությունն ու քննչական բաժինը տաք հետքերով բացահայտել էին, իսկ աշխատակցին սպանած անձին հայտնաբերել էին Հայաստանի սահմանից դուրս։
