«Անդրանիկ Թևանյանը վերջերս Սերժ Սարգսյանի հասցեին մեղադրանքներ է հնչեցրել՝ ստեր տարածելու մեջ. ըստ ձեզ նրա խոսքերը որքանո՞վ են հավաստի»,- ԱԺ խմբակցությունների ճեպազրույցների ժամանակ նման հարց ուղղվեց ԱԺ «Հայաստան» խմբակցության պատգամավոր Արծվիկ Մինասյանին, ինչին նա պատասխանեց. «Անդրանիկ Թևանյանը ունի իր քաղաքական գիծը, ուղղությունը, առանձին քաղաքական դաշինքի գործընթացներում է: Ես հարկ չեմ համարում կողմ կամ դեմ արտահայտվել նրա մոտեցումներին: Ես գտնում եմ, որ ընդդիմադիր դաշտում փոխադարձ հարձակումները լավ բանի չեն բերում: Այսօր ո՛չ ժամանակն է, ո՛չ տեղը, որպեսզի մեկը մյուսին մեղադրանքներ հնչեցնեն»: Արծվիկ Մինասյանի խոսքով՝ ներկա պայմաններում, երբ պետությունը կործանող քաղաքական ուժի հեռացման առաջնահերթությունն է դրված, բոլորը պետք է լծվեն այդ խնդրի լուծմանը, որը պահանջում է նաև բոլոր ընդդիմադիր ուժերի կոնկրետ արժեքների շուրջ համաձայնություն՝ պետություն, հայրենիք, ազգային արժանապատվություն, համահայկական համախմբում: