Չնայած լրատվամիջոցների և հասարակության մի մասի հետաքրքրությանը՝ հայկական կուսակցությունների մի մասը, այնուամենայնիվ, շարունակում է լռել և դեռևս չի հայտնում հայաստանյան առաջիկա նախագահական ընտրություններին  կառաջադրի իր թեկանծուին, թե՞ ոչ: Ո՞րն է այս լռության պատճառը: Այս և թեմայի հետ կապված այլ հարցերի շուրջ ASEKOSE.am-ի թղթակիցը զրուցել է ԱԺ ՀՅԴ խմբակցության պատգամավոր Աղվան ՎԱՐԴԱՆՅԱՆԻ հետ:

- Պրն. Վարդանյան, ըստ Ձեզ,  տարօրինակ չէ՞, որ ընտրություններից մի քանի ամիս առաջ քաղաքական դաշտում նման անորոշ իրավիճակ է տիրում:

- Ինչ-որ առումով անորոշ վիճակ է, նախորդ շրջաններում մի քանի ամիս առաջ թեկնածուներն արդեն հայտնի էին լինում: Այս իրավիճակի պատճառը խորհրդարանական ընտրություններն էին: Իշխանություններն այս ընտրությունները բնորոշում էին որպես առաջընթաց, բայց մեզ` ընտրության անմիջական մասնակիցներիս համար այդպես չէ: Այս խորհրդարանական ընտրություններում մեծ դերակատարություն են ունեցել պետական համակարգի վարչական ռեսուրսներից մեկի` անսահմանափակ և հսկայական թվով ընտրակաշառքները:

 -Իսկ կոնկրետ ՀՅԴ-ի դեպքում  ո՞րն է պատճառը, որ չի հայտնում նախագահական ընտրություններում իր առաջադրվելու կամ չառաջադրվելու  մասին:

-Քանի որ նախագահական ընտրությունների առաջադրումները սկսվելու են դեկտեմբերի վերջից, ապա շտապելու կարիք չկա: Դաշնակցությունը հայտարարել է այն քաղաքական օրակարգը, որի շրջանակներում կապում ենք Հայաստանի ապագայի ձևավորումը: Մենք կարևորում ենք այն հիմնահարցերը, որոնք ծառացած են Հայաստանի առջև: Առաջարկելու ենք մեր հիմնահարցերը քննարկել քացաքացիական ուժերին, հասարակական խմբերին և նեղ մասնագիտական խմբերին: Եթե հասարակության մեջ ձևավորվի համաձայնություն, որ երկիրը պետք է այս ուղղությամբ զարգանա, այս նախագծերը կիրականացվեն: Միայն դրանից հետո կքննարկենք առաջադրման հարցը. սա է ճիշտ ճանապարհը:

- Քաղաքագետների մի մասի համոզմամբ,  եթե ընդդիմությունը հանդես գա մեկ միասնական թեկնածուով, ապա հաղթելու հավանականությունը ավելի մեծ կլինի: Հնարավո՞ր է՝  ՀՅԴ-ն ներկայանա ընդդիմության մյուս ներկայացուցիչների հետ մեկ միասնական թեկնածուով:

-Բնական է, եթե ընդդիմությունը կարողանա համախմբվել մեկ միասնական թեկնածուի շուրջ, եթե բոլորը նույն ուղղությամբ աշխատեն, նույն սկզբունքներով և գաղափարներով առաջնորդվեն, հաղթելու հավանականությունը կմեծանա, բայց սա միայն չոր տեսություն է, դրա համար նախադրյալներ չկան:

-Նախադրյալներ ասելով՝ նկատի ունեք գաղափարների՞ տարբերությունը:

-Գաղափարների խնդիր կա, ծրագրային խնդիր, ի վերջո անցած ճանապարհի խնդիր, ամբիցիաների խնդիր … խնդիրները շատ են: 

-Պրն. Վարդանյան, իսկ ԲՀԿ-ին, որը ներկայանում է որպես այլընտրանք, տեսնու՞մ եք ընդդիմադիր դաշտում:

-Ճիշտ է, ԲՀԿ-ն ներկայանում է որպես այլընտրանք, բայց վերջին մի քանի ամիսների ընթացքում վարում է ընդդիմադիր քաղաքականություն:

- Ասացիք, որ ընտրություններում մեծ դերակատարություն ունեն ընտրակաշառքները: Իսկ ՀՅԴ-ն ընտրակաշառքների վերացման հետ կապված ունի՞ իր ծրագրերը:

-Ընտրակաշառքները Դաշնակցության կամ որևէ այլ քաղաքական ուժի ձեռնարկվելիք քայլերը չեն, դա իշխանության խնդիրն է, ուստի իշխանությունը պետք է հայտարարի, որ բացառում է ընտրակաշառքը, նման յուրաքանչյուր դեպք պետք է կանխվի իր կողմից, քանի որ ունի դրա բոլոր հնարավորությունները:

-Եթե ընտրակաշառքը չի կանխվում իշխանությունների կողմից, արդյո՞ք դա մեզ հիմք է տալիս ենթադրել, որ չկանխվելը բխում է հենց իշխանության շահերից:

-Բնականաբար,  հիմք է տալիս, բայց եթե իշխանությունները գտնում են, որ սա կարող է անընդհատ շարունակվել, ապա կարող եմ հավաստիացնել, որ ի վերջո այս շղթան կտրվելու է…

-Անդրադառնանք կառավարության առաջարկած նվազագույն աշխատավարձը 2500 դրամով բարձրացնելու և 35 հազ. դարձնելու նախագծին: Ի՞նչ կասեք այս հարցի շուրջ, չէ որ Դաշնակցությունը իր նախագիծն ունի նվազագույն աշխատավարձի վերաբերյալ:

-Չէի ցանկանա մեկնաբանել մեր պատգամավորների կարծիքները, բայց միանշանակ ակնհայտ է, որ 35 հազ. դրամը բավական ցածր աշխատավարձ է:
Կառավարությունն, ըստ իր նախագծի, 2014-ին նվազագույն աշխատավարձը բարձրացնելու է 10հազ. դրամով, նույնը նաև 2015-ին, սակայն այն տնտեսական իրավիճակում, որում գտնվում է մեր երկիրը հնարավոր չէ նման նախագծի իրականացումը, ուստի կառավարության այս խստումները կրկին չեն կատարվի:
 

-Ըստ Դաշնակցության, ո՞րն է այս խնդրի լուծումը:

-Դաշնակցությունն առաջարկում է ոչ թե կոնկրետ թիվ ֆիքսել, այլ այդ թիվը պայմանավորել մի քանի գործոններով. միջին աշխատավարձից կախվածությունը, գնաճի հետ կապվաճ շարունակական աճը, սպառողական ինդեքսը, աճը միկրոտնտեսական խնդիրների վրա,  այս գործոններից յուրաքանչյուրի ուսումնասիրումը խիստ կարևոր է:

-Քանի որ խոսեցինք նոր նախագծերի մասին, ի՞նչ կասեք ՀԱԿ-ի առաջարկած ընտրական օրենսգրում փոփոխություններ կատարելու նախագծի մասին:

-Այդ նախագիծը դեռևս չի քննարկվել, սակայն համոզված եմ, որ մինչև նախագահական ընտրություններ, ընտրական օրենսգրքում փոփոխություններ չեն արվի, կամ էլ կարող են մասնակի փոփոխություններ լինել` պայմանավորված եվրոպական դիտորդների առկայությամբ:

 

- ՀՅԴ-ն  ի՞նչ ակնկալիքներ ունի առաջիկա ընտրություններից:

 

- Ցավով պետք է նշեմ, որ նախագահական ընտրությունները սկսած 1996 թվականից, հակամարտությունների, առճակատումների պայմաններում են ընթացել, ինչի արդյունքում մենք երկիր ենք կորցրել ինչ-որ չափով, ուստի հասարակությունը պետք է այնքան հասուն լինի, որ ժողովրդական խոսքի համաձայն  նույն փոցխի վրա նորից չկանգնենք…

Հարցազրույցը՝ Սեդա ՂՈՒԿԱՍՅԱՆ