«Դեմոկրատական այլընտրանք» կուսակցության նախագահ Սուրեն Սուրենյանցի թելեգրամյան գրառումը․ «Երբ քաղաքացու վրա թքած ԱԺ նախագահ Ալեն Սիմոնյանը պաշտոնանկ չեղավ ու պատասխանատվության չենթարկվեց, ակնհայտորեն սա իշխանության պատգամավորների խուլիգանական վարքագիծը խրախուսելու նպատակ ուներ:

Անդրանիկ Քոչարյանը սովորական խուլիգան է:

Նման դեպքերում լրագրողները պետք է նրա նկատմամբ տոտալ բոյկոտ հայտարարեն, իսկ մենք բոլորս պատգամավորի մանդատը պետք է ազատագրենք «ծերունի ավազակ» խուլիգանից:

Ուժեղ աջակցություն Հռիփսիմե Ջեբեջյանին»։

***

ԱԺ «Հայաստան» խմբակցության պատգամավոր Լիլիթ Գալստյանի գրառումը․ «Անդրանիկ Քոչարյանի վարքն ինձ չզարմացրեց։ Նույնիսկ մտածում էի՝ արժե՞ արդյոք դրան անդրադառնալ։
Նա ոչ առաջինն է, ոչ էլ՝ վերջինը։ Վաղուց ցինիզմը, սուտը, գռեհկությունը, անպարկեշտությունն ու ժամանակակից խոսույթով՝ հաբռգածությունը, քաղաքական մեծամասնության համար դարձել են վարքականոն ու «մշակույթ», «համոզիչ» լինելու ցուցիչ, դիմացինին լռեցնելու նողկալի դիմակ։
Պարզապես այսպիսին է նրանց առաջնորդի սահմանած «նշաձողը»։ Եվ կատարվածը սոսկ կին լրագրողի թիրախավորելու վարք չէր։ Այս ցինիզմով և անպատժելիությամբ նրանք քողարկում են սեփական անկարողությունն ու մեղքերը, խուսափում դառը ճշմարտությունից։ Սա նաև քաղաքական բոլշևիզմ է, իրականությունից կտրվածների ու իրականության հետ առերեսվելուց վախեցածների վարք։ Կարմիր բերետավորների թիկունքում պատսպարված իշխանության հենարանը անսահման ցինիզմն ու մահակն են․․․
ԱՔ-ն մենակ չէ, մենակ չէ․․․Եվ ոչ էլ կատարվածն է թյուրիմացություն․ տարիներ առաջ նույն «խրոխտ» վարքով, այդ նույն աք-ն կին քաղաքական գործչի էր վիրավորել․․․ նրանից զուր ներողություն մի ակնկալեք։
Եվ մի՞թե արժեք ունի այդ տեսակի և, առհասարակ, այդ խմբակցությունից որևէ մեկի ներողությունը․․․Նրանք՝ հավաքաբար, վաղուց են հատել բոլոր կարմիր գծերը, տրորել մեղքի ու պատասխանատվության բոլոր հնարավոր նշաձողերը։
Այս տեսակին պիտի մերժել, անհնարին դարձնել սրանց վերարտադրությունը, ոչ թե՝ ներողություն ակնկալել»։