Լրագրող Նաիրի Հոխիկյանի ֆեյսբուքյան գրառումը․ «Աբովյանի ծննդատանը կատարվող բազմաթիվ չարաշահումներին անդրադարձել է «Առողջության իրավունք» իրավապաշտպան ՀԿ-ի ղեկավար Անուշ Պողոսյանը՝ փաստերով նշելով, թե ինչպես է ծննդատան տնօրեն ոմն Նորայր Միքայելյանը աշխատողներից ապօրինի կերպով աշխատավարձի պահումներ արել, նաև պաշտոնական դիրքի այլ առերևույթ խոշոր չարաշահումներ։
Այդ ապօրինությունների մասին պաշտոնապես հաստատել են Առողջապահության և աշխատանքի տեսչությունը, ինչպես նաև Կոտայքի մարզպետարանը, սակայն ծննդատան տնօրենի նկատմամբ բավարարվել են սոսկ նկատողությամբ, ինչը կառավարության կողմից բացահայտ հովանավորչության մասին է խոսում։
Աբովյանի ծննդատան աշխատողներից ոմանք օրերս էլի ահազանգել էին, թե տվյալ անձը հոխորտում է, թե իրեն ոչ ոք չի կարող պատժել, քանի որ իր թիկունքում հենց մարզպետն է։
«Արարատյան պետություն» ՀԿ-ի կողմից օրերս մի գրություն էինք ուղարկել վարչապետի աշխատակազմին՝ պահանջելով հստակեցնել՝ արդյո՞ք կա հովանավորչություն այդ պաշտոնյայի ապօրինի գործողությունների նկատմամբ՝ հաշվի առնելով, որ Կոտայքի մարզպետարանը ևս աչք է փակում եղած բազում խնդիրների վրա։
Փոխանակ վարչապետի աշխատակազմը գրությունը վերահասցեագրեր Հակակոռուպցիոն կոմիտե կամ իրավապահ այլ մարմիններին, ուղարկել է Կոտայքի մարզպետարան՝ ճշտելու, թե մարզպետը հովանավորո՞ւմ է արդյոք Աբովյանի ծննդատան տնօրենին, թե՞ ոչ։
Անուշ Պողոսյանին առաջարկում եմ ոլորտային առաջնահերթությունը հաշվի առնելով՝ հաջորդ քայլով մտնել Հակակոռուպցիոն կոմիտե և քրեական գործի նախաձեռնություն սկսել»։